Европа Иттифоқига аъзо давлатлар ташқи ишлар вазирлари Россия фуқароларига Шенген визаларини беришнинг соддалаштирилган тартибини бекор қилиш ғоясини қўллаб-қувватлайди. Бу ҳақда The Financial Times хабар бермоқда.
Ушбу мавзу бўйича музокараларда қатнашган уч нафар расмийнинг айтишича, бу ҳақда 30 август куни Прагада бўлиб ўтадиган ташқи ишлар вазирларининг икки кунлик йиғилишида расман эълон қилинади. Аввалроқ бундай таклифни Чехия ташқи ишлар вазири Ян Липавский билан чиқиши хабар қилинганди.
Россия ва Европа Иттифоқи ўртасида 2007 йилда виза тартибини соддалаштириш бўйича келишув тузилган. Агарда ушбу келишувдан воз кечилса, унда Шенген визасини олишга уринаётган россияликлар кўпроқ ҳужжатлар тақдим этишига тўғри келади. Виза бериш учун консуллик йиғими 35 евродан 80 еврога кўтарилади. Аризаларни кўриб чиқиш вақти эса узоқроқ муддатга чўзилади.
Биз фавқулодда вазиятдамиз ва бу истисно чораларини талаб қилади. Бироқ визани соддалаштиришдан воз кечишдан кўра узоқроққа боришни истаймиз», — дейди исмини ошкор этмаган европалик расмий.Унга кўра, йил охиригача бу бўйича жиддийроқ чекловлар ҳам қабул қилиниши мумкин.
Изоҳ (0)