Германия ҳукумати коронавирусга қарши курашиш қоидаларини қайта кучайтирмоқда: 1 октябрдан бутун мамлакат бўйлаб самолётлар ва узоқ масофага қатновчи поездлардаги йўловчилар юқори ҳимоя ниқобларини тақиши шарт. Тиббиёт муассасаларида эса нафақат ниқоблар, балки эмлаш сертификати ҳам талаб қилинади.
Германия Федерал Соғлиқни сақлаш вазирлигининг таъкидлашича, штат ҳукуматлари ўз истагига кўра ва жойлардаги вазиятга қараб қўшимча талабларни киритиши мумкин — масалан, жамоат транспорти ва ресторанларда ниқоб режимини жорий қилиш, оммавий тадбирларда ижтимоий масофани қайтариш каби.
Германия ССВ мамлакат ёздан эпидемия нуқтаи назаридан нисбатан муваффақиятли ўтганини маълум қилди. Бироқ бир неча ҳафта олдин, асосан, қариялар орасида COVID-ўлимларнинг янги ўсиши қайд этилган.
Берлинда расмийлар янги карантинлар ёки мактабларда дарсларни бекор қилиш ҳақида гап йўқлигини таъкидламоқда.
Шу билан бирга, самолётларда ниқоб тақиш талаби ҳукумат коалициясини кескин танқид остида қолдирди: ижтимоий тармоқларда ҳукуматнинг Канадага учаётган самолётидан суратлар тарқалган ва маълум бўлишича, амалдорларнинг ўзлари ниқобсиз учган. Расмийлар бу ҳарбий-ҳаво кучларининг рейси эканини айтишди, унда эса ниқоб эмас, сертификат талаб қилинади.
Изоҳ (0)