Италия жанубидаги Скуиллаче кўрфазида 40 метрли «Сага» яхтаси чўкиб кетди, деб ёзади Meduza.
Ҳодиса 21 августга ўтар кечаси, кема Кайман ороллари байроғи остида Галлиполидан Миллацога йўл олган пайтида юз берган. Кема қуйруғи сувга тўла бошлагач, италияликлардан иборат экипаж фалокат сигналини юборган.
Қирғоқ соқчилиги хизмати тўрт йўловчи ва бир экипаж аъзосини эвакуация қилган, тўрт киши носозликни бартараф қилиш учун қолдирилган. Яхтани шатакка олиб портга келтиришга уринишган, аммо кема ўнг ёнбошига кескин оғиб кета бошлаган. Яхта бутунлай чўкиб кетгунича, бортда қолган экипаж аъзоларини қутқаришга улгуришди.
«Сага» яхтаси Италияда 2007 йилда Monaco Yachting & Technologies компанияси томонидан қурилган. ОАВлар маълумотларига кўра, яхта «Кузбассразрезугол» холдинги эгаларидан бири ва «Крутрейд» компанияси директорлар кенгаши раиси, россиялик бизнесмен Геннадий Айвазянга тегишли бўлиб, унинг қиймати 50 миллион долларга баҳоланади.
Изоҳ (0)