Рим папаси Дарья Дугинани урушнинг «бегуноҳ қурбони» деб атади. Украина элчиси тажовузкор ва жабрланувчининг фарқига бориш кераклигини айтди

Рим папаси Франциск Украинадаги урушга ярим йил бўлгани муносабати билан мурожаат эълон қилиб, у тез орада тугашига умид билдирди, шунингдек, урушнинг хунини бегуноҳ одамлар тўлаётганини таъкидлади, деб ёзади Meduza.

«Жуда кўп украиналик ва россиялик болалар етим бўлиб қолди. Етимлик миллат танламайди — бу болалар, рус ёки украин бўлишидан қатъи назар, ота ёки оналаридан ажралган», — деди понтифик.

Ўз мурожаатида Рим папаси файласуф Александр Дугиннинг қизи Дарья Дугинани ҳам тилга олди: «Москвада автомобилига ўрнатилган бомба портлашидан ҳалок бўлган бечора қиз ҳақида ўйлаяпман. Урушнинг хунини бегуноҳлар тўламоқда! Келинглар, бу ҳақда ўйлаб кўриб, бир-биримизга айтайлик: уруш — бу тентаклик деб».

Украинанинг Ватикандаги элчиси Андрей Юраш понтификнинг мурожаатини танқид қилиб, унинг Дарья Дугина урушнинг «бегуноҳ қурбони»га айлангани ҳақидаги гапларини «ҳафсалани пир қилувчи» деб атади.

«Тажовузкор ва жабрланувчи ҳақида битта тоифа сифатида гапириб бўлмайди. Россия империализми раҳнамосини қандай қилиб бегуноҳ қурбон дейиш мумкин? Уни руслар ўлдириб, уни жафокаш қилиб кўрсатмоқчи ва урушга қалқон қилмоқчи бўлган», — деб ёзди дипломат Twitter’да.

Дарья Дугина — файласуф Александр Дугиннинг қизи — 20 август куни Подмосковьеда автомобили портлаб кетиши оқибатида ҳалок бўлди. Россия Федерал хавфсизлик хизмати унинг ўлдириб кетилишини Украина махсус хизматлари уюштирганини, қотиллик ижрочиси эса Украина фуқароси Наталья Вовк бўлганини маълум қилди. У 12 ёшли қизи билан Россияга келиб, Дугина яшайдиган уйда хонадон ижарага олган ва уни кузатган, унинг автомобили масофадан туриб портлатилганидан кейин эса Эстонияга жўнаб кетган. Киев Дугинанинг ўлдирилишига алоқадорлигини рад этмоқда.