Францияда ва умуман Европада «тўкин-сочинлик ва беғамлик даври» тугади, деди Франция етакчиси Эммануэль Макрон вазирлар кенгаши мажлиси очилишида. У французларни инқирозларни тартибга солиш учун жипслашишга чақирди, деб ёзади «РБК».
«Менинг фикримча, биз ҳозир бошдан кечираётган нарса — бу ўзига хос кескин бурилиш ёки катта ўзгариш. Моҳиятан, биз тўкин-сочинлик, арзон ликвидлик даврининг охирида яшаяпмиз — биз бунинг иқтисодий оқибатларини кўрамиз, бу — маҳсулотлар ва технологияларнинг ҳамёнбоплик даври тугади, демакдир, улар бизга доим қўлимиз етадигандек бўлиб туюларди», — деди у.
«Бундан ташқари, Макрон иқлим инқирозини ва Европа учун янги рискларни, шунингдек, киберхавфларни тилга олди. Чунончи, унинг фикрича, Францияда экологик режалаштириш бўйича катта ишни амалга ошириш ва «иссиқхона газлари ажралиб чиқишини қисқартириш учун эндигина тугаган мавсумга нисбатан аниқ ва қатъий танловни амалга ошириш, қилинган саъй-ҳаракатларни икки карра кучайтириш, шунингдек, янада тезкор тарзда мамлакатни қайта қуриш» зарур.
Макрон, шунингдек, «либерал бўлмаган, авторитар режимлар» ўсаётгани ва мустаҳкамланаётганига эътибор қаратди. Унинг таъкидлашича, Франциядаги «эркинлик режими» «ўз қийматига эга» ва «қурбонларни талаб қилиши мумкин».
Республика президенти Украинадаги ҳарбий низога ҳам тўхталиб ўтди ва бу даврни «беташвиш ҳаётнинг тугаши» деб атади.
Россиянинг Украинадаги ҳарбий операцияси ва етказиб беришлар занжирини узиб юборган жавоб санкциялари фонида Ғарбий Европада ёнилғи ва ўғит нархи ошиб кетди. Натижада Европа мамлакатлари бир неча ўн йиллар ичида рекорд даражадаги нархлар ўсишига тўқнаш келди, шу жумладан, озиқ-овқат маҳсулотлари ва коммунал хизматлар қимматлашди.
Изоҳ (0)