Россиянинг Украинадаги ҳарбий операциясига қарши баёнотни БМТга аъзо 193 та мамлакатдан 54 таси имзолади, деб ёзади «РБК». Бу ҳақда Украинанинг ташкилотдаги доимий вакили Сергей Кислица Хавфсизлик кенгаши мажлисидан кейинги матбуот анжуманида маълум қилган.
Имзолаганлар орасида Австралия, Австрия, Бельгия, Канада, Чехия, Дания, Эстония, Финляндия, Франция, Германия, Италия, Япония, Латвия, Литва, Молдова, Жанубий Корея, Туркия, АҚШ, Британия ва бошқалар бор.
Ушбу баёнотда БМТга аъзо давлатлар Россияни Украинадаги жанговар ҳаракатларни зудлик билан тўхтатишга чақирди.
Жанговар ҳаракатларнинг илк кунларида БМТ Хавфсизлик кенгаши резолюция лойиҳасини ишлаб чиқиб, унда Россияни Украинадаги ҳарбий операцияни тўхтатишга чақирган эди. Овоз бериш натижаларига кўра, Хавфсизлик кенгашига аъзо мамлакатларнинг 11 таси резолюция қабул қилинишини ёқлаб чиққан, битта мамлакат қарши чиққан, учта давлат, шу жумладан, Хитой — бетараф қолган. Россия резолюцияга вето қўйган, шундан кейин у қабул қилинмай қолган.
Изоҳ (0)