Марҳум қизиқчи Ҳожибой Тожибоевнинг кенжа қизи Мадина Тожибоева «Омон-омон» кўрсатувига берган интервьюсида ўз ҳамкасби, Uztim тахаллуси остида ижод қиладиган хонанда ва актёр Ислом Мансуров билан оила қураётгани ҳақида гапирди.
Ижтимоий тармоқда танишган жуфтлик
«Тўғрисини айтсам биз муносабатларимизни оммага эълон қилмоқчи эмас эдик. Шу кунгача юрдим, ижод қилдим, ўйнадим, кулдим, севги мавзусига тўхталмагандим. Кейин уйдагилар ҳам уйланмайсанми, деб бошимни оғритишди. Вақти келади, майли, деб тўғри келганга уйланиб бўлмайди.
Мадинани кўриб юрагим жиз этди. Кейинроқ гаплашиб кетганмиз, «Bigo live» деган платформа бор, шунда жонли эфир қилаётган вақтимда Мадина ёзиб қолган. Кейин қарасам Мадина Тожибоева деб ёзилган экан, шунда сиз Интизорнинг синглисимисиз, нима учун сизни кўрмаганман деб сўраганман.
Мадина эса мен отамнинг кенжа қизиман, ҳеч қаерда чиқмайман деган. Кейин унинг ўзи ҳам саҳифа очди, бирга ишладик. Юрагим жиз этгани учун, бир ҳафта бўлмай унга севги изҳор қилдим. Вақти ўтиб унга сен учун Тошкентга бораман десам ишонмади. Келиб-кўришдим, бир-биримизга эътибор қилишни бошладик», — дейди хонанда.
Мадина Тожибоева эса Ислом Мансуровнинг муносабатларини кўп рад этганини, хонанда унга айтмасдан уйига совчи жўнатгани ва бу таклиф уйдагиларига маъқул бўлганидан кейин муносабатларга ишонч билдирганини айтган.
«Мен уларга кўп рад жавобини бердим, кейин бу инсон менга айтмасдан катта опам билан гаплашиб онасини уйимизга жўнатган, уйимдагилар буни билган, мен билмаганман. Кейин уйимдагилар айтиб қолди, Исломжондан совчи келди, улар бизга ёқди, гаплашиб кўр, ўзи нимага рад жавобини бериб юрибсан, унинг ойиси сиқилиб юрган экан деган гаплардан кейин мен шу нарсага ишонч билдиришга қарор қилдим. Демак, рост экан, шунчаки бўлганда онасини юбормас эди, деб ўйладим.
Бундан ташқари хонанда Мадина Тожибоева билан бирга ижод қилишини, мусиқа йўналишида ҳам фаолият юритишини айтиб ўтган.
«Биз жуфтлик бўлиб мусиқа айтмоқчимиз. Ҳозирги кунда тароналаримиз яхши бастакорларимиз томонидан басталанмоқда. Ном қўймаймиз. Борлигимизча чиқамиз», — дейди Ислом Мансуров.
Мадина Тожибоева санъатга қизиқиш билан кириб келгани ҳақида
«Санъатга киришга қарор қилдим. Онам олийгоҳга топшир, ўқи қизим, бизнинг оиламизда ҳамма ўқиган, сен ҳам ўқишинг керак деган фикрни билдирди. Ёшликдан битта оилага битта санъаткор етади деб ўйлаб юрардим, отамнинг издоши битта Интизор опам бўлса етади деб ўйлаганман. Кейинчалик ўйлаб қарасам менинг ҳам санъатга қизиқишларим катта, ортиб бормоқда, бари бир шу йўналишга кирдим. Қонда бор, ториб кетди», — дейди Мадина Тожибоева.
Мавзуга доир:
Изоҳ (0)