Туркиянинг дунёга машҳур актрисаларидан бири Демет Эвгар 2022 йилнинг 18 август куни қиз фарзандли бўлди. Бу ҳақда турк оммавий ахборот воситалари хабар берди.
Ҳозирда 42 ёшда бўлган Демет Эвгар 2022 йил 17 март куни унга 6 йилдан бери таниш бўлган тадбиркор Левент Бабаташ билан турмуш қурган.
Актриса ижтимоий тармоқлардаги саҳифаларига ҳомиладорлик пайтидаги суратларини жойлаб борган. У турк оммавий ахборот воситаларининг бирига берган интервьюсида семиришдан қўрқмаслигини, турмуш ўртоғи уни ҳар қандай ҳолатда ҳам қўллаб-қувватлашини, жисмоний ҳолати унинг ҳомиладорлигига ҳам таъсир қилишини айтган.
Демет Эвгар фаолияти давомида 25 та лойиҳада иштирок этган. Актриса «Ёрқин аланга» сериалида зулмкор турмуш ўртоғига қаршилик кўрсатишга уринган, севгисини топишга, уни ҳимоя қилишга, адолатга эришишга, жамиятни психологик ва жисмоний муаммоларга эътибор қаратишга мажбурлаган аёл — Жемре Каябели ролини ўйнаган.
Демет Эвгар нафақат машҳур кино актрисаси, балки ажойиб театр актрисаси ҳам ҳисобланади. У 17 ёшида Манисадаги Афсем театрига ҳаваскор сифатида борган. Актриса Истанбул давлат консерваториясининг театр бўлимида таҳсил олаётганда ҳам саҳнада рол ўйнашни давом эттирган.
Унинг иштирокидаги «Анна Каренина», «Басамак» спектакллари театр соҳасида бериладиган машҳур мукофотлар билан тақдирланган. Меҳмет Биркие бошчилигида саҳналаштирилган «Cimri» спектаклидаги Элиза роли учун эса у 2010 йилда 8-театр соҳасидагиларни мукофотлаш маросимида «Йил актрисаси» мукофотига сазовор бўлди.
Жаҳон миқёсидаги дурдона асарларда, жумладан, «Макбет» ва «Қирол Лир» каби театрлаштирилган спектаклларда иштирок этиш Деметга яхши актёрлик маҳоратини эгаллашга ва мураккаб ролларни муваффақиятли ижро этишга ёрдам берди.
Театрда эгаллаган маҳорати туфайли актриса кино саноатидаги фаолиятини ҳам муваффақиятли бошлади. Демет бир неча мавсумдан иборат «Эркак ва аёл» сериалидаги иштироки туфайли Туркия кино оламида юксак эътироф ва машҳурликка эришди. У ушбу сериалда бош ролни, яъни Зейнеп исмли образни гавдалантирди.
Сериаллар ва фильмлардаги иштироки учун Демет Эвгар бир неча бор телевидение йўналишида ва кино соҳасида бериладиган мукофотларга сазовор бўлган. «Ҳовли», «Ошхона столи» каби лойиҳаларида иштирок этиш эса актрисанинг кўп қиррали истеъдод эгаси эканидан далолат беради. У «Ҳовли» телесериалида қизини йўқотган маҳбус ролини ижро этган.
«Ошхона столи» лойиҳасида эса у қотиллика қўл урган уй бекаси образини гавдалантирган.
Бундан ташқари, актриса хонандаликда ҳам ўзини синаб кўрган. Унинг мухлислари ҳам актрисанинг яхши қўшиқ куйлаши ҳақида гапирган.
Изоҳ (0)