1931 йилдан бери Швейцариядаги 1400 музликларнинг ярмидан кўпи эриб кетган ва уларнинг эриш тезлиги ортишда давом этмоқда. Бу ҳақда Швейцария институтларининг қўшма тадқиқотига таяниб, Associated Press хабар берди.
Швейцария олий технология институти Цюрих Швейцария ўрмонлар, қор ва ландшафтлар бўйича Федерал тадқиқот институти билан ҳамкорликда мамлакатда ХХ асрда музликларнинг йўқотилиши бўйича ўтказилган тадқиқот натижаларини эълон қилди. Тадқиқот қисман 1931 йилдан бери музликлар топографиясидаги ўзгаришлар таҳлилига асосланган.
Олимларнинг маълум қилишича, 1931 йилдан 2016 йилгача музликлардаги муз миқдори икки баравар, кейинги олти йил ичида эса яна 12 фоизга камайган. Тадқиқот давомида жамоа дала ўлчовлари, аэрофотосурат ва тоғ чўққиларининг фотосуратлари, жумладан, иккала жаҳон уруши оралиғидаги вақтда чўққилардан олинган 22 мингга яқин суратлардан фойдаланган. Олимлар тасвирларда ернинг шакли ва ҳолатини солиштирган, шунингдек, қуруқлик майдонларининг бурчакларини ўлчаш учун камералар ва асбоблардан фойдаланган. Улар турли вақтлардаги музликлар топографиясини солиштирган, бу эса муз ҳажмининг эволюциясини ҳисоблаш имконини берган.
Олимлар, шунингдек, 1920 ва 1980 йилларда муз массасининг ўсиши кузатилганини аниқлади, бироқ у умумий эриш тенденцияси соясида қолиб кетган.
Европа Алп тоғларидаги барча музликларнинг деярли ярми Швейцарияда жойлашган. Ҳамма музликлар бир хил тезликда эримайди: бунга кўплаб омиллар, жумладан, баландлик ва музликлардаги чиқиндилар миқдори таъсир қилади.
Изоҳ (0)