Нидерландия Украинага ёрдам бериш учун 80 миллион евро миқдорида қўшимча молиявий ёрдам пакетини ажратди. Бу ҳақда мамлакат ҳукумати сайтида хабар қилинган.
Қўшимча ёрдам ажратиш тўғрисидаги қарор Нидерландия мудофаа вазири Кайса Оллонгрен ҳамда ташқи савдо ва ҳамкорлик вазири Лише Шрайнемахернинг Киев ва Ирпинга ташрифидан сўнг қабул қилинган.
Ажратилган пулнинг катта қисми Украина инфратузилмасини тиклашга йўналтирилади. Тахминан 65 миллион еврони ҳарбий ҳаракатлар пайтида вайрон бўлган кўприклар, тўғонлар, касалхоналар ва бошқа инфратузилмаларни реконструкция қилиш билан шуғулланувчи Нидерландия компаниялари олади. Яна 10 миллион евро эса портловчи қурилмаларни зарарсизлантиришга йўналтирилади.
Яна 2,5 миллион еврони эса Нидерландия Украина билан иқтисодий ислоҳотлар бўйича ҳамкорлик қилиш учун Европа тикланиш ва тараққиёт банкига (EТТБ) юборади. Амстердам можаро пайтида жинсий ва гендер асосидаги зўравонлик қурбонларини қўллаб-қувватлаш учун 2 миллион евро ажратди. Шунингдек, 1 миллион евро Херсон, Одесса ва Николаевни реконструкция қилиш режаларига ёрдам беради.
Умуман олганда, Россиянинг Украинадаги босқини бошланганидан бери Нидерландия Киевга 210 миллион еврога яқин маблағ ажратди. Шунингдек, мамлакат Украина Қуролли кучларини қурол-яроғ ва кийим-кечак билан таъминлаган.
Июль ойи ўрталарида Нидерландия бош вазири Марк Рютте Киевга ташриф буюриб, Украина президенти Владимир Зеленский билан учрашган эди. Зеленский айтганидек, томонлар Украинага артиллерия тизимлари ва бошқа қуролларни етказиб бериш масаласини муҳокама қилган. Рюттенинг ўзи НАТО давлатларини Киевга ёрдам беришга чақирган.
Изоҳ (0)