АҚШ Туркияга босимни кучайтириб, компанияларни Россиянинг санкциялар остидаги жисмоний ва юридик шахслари билан ҳамкорлик қилишдан огоҳлантирмоқда. Бу ҳақда The Wall Street Journal хабар берди.
22 августда Туркиядаги Америка Савдо палатасига юборилган эслатмада АҚШ молия вазири ўринбосари Адевале Адеемо турк компаниялари санкцияга учраган Россия вакиллари билан иш олиб боришса, мамлакат чекловларига тушиб қолиш хавфи борлигини айтган.
АҚШнинг санкциялар рўйхатига киритилган шахсларга моддий ёрдам кўрсатадиган ҳар қандай шахс ва ташкилотларнинг ўзи чекловлар остида қолиш хавфи остида, — дейилади ҳужжатда.
Вазир ўринбосари турк банкларининг бир вақтнинг ўзида Россия ва Америка банклари билан вакиллик алоқаси бўла олмаслигига ҳам эътибор қаратди.
Туркия ҳукумати бутун уруш давомида ҳам Россия, ҳам Украина билан муносабатларни сақлаб келган. Украинани қурол-яроғ билан таъминлаган ва Россияга қарши санкциялар қўйишда Ғарб давлатларига қўшилмасликни танлаган.
Худди шундай мактуб Туркиянинг йирик саноатчилар ва тадбиркорлар бизнес уюшмаси TUSAID’га ҳам юборилди, — дейилади хабарда.
Бундай ёзма огоҳлантиришлар Туркияни Россияга қарши халқаро санкцияларга риоя қилишга мажбурлаш учун АҚШ босими кучайганидан далолат беради.
Аввалроқ Туркия Россиядан нефть импортини икки баравар оширгани ҳақида хабар берилганди.
Изоҳ (0)