AQSH Turkiyaga bosimni kuchaytirib, kompaniyalarni Rossiyaning sanksiyalar ostidagi jismoniy va yuridik shaxslari bilan hamkorlik qilishdan ogohlantirmoqda. Bu haqda The Wall Street Journal xabar berdi.
22-avgustda Turkiyadagi Amerika Savdo palatasiga yuborilgan eslatmada AQSH moliya vaziri o‘rinbosari Adevale Adeyemo turk kompaniyalari sanksiyaga uchragan Rossiya vakillari bilan ish olib borishsa, mamlakat cheklovlariga tushib qolish xavfi borligini aytgan.
AQSHning sanksiyalar ro‘yxatiga kiritilgan shaxslarga moddiy yordam ko‘rsatadigan har qanday shaxs va tashkilotlarning o‘zi cheklovlar ostida qolish xavfi ostida, — deyiladi hujjatda.
Vazir o‘rinbosari turk banklarining bir vaqtning o‘zida Rossiya va Amerika banklari bilan vakillik aloqasi bo‘la olmasligiga ham e’tibor qaratdi.
Turkiya hukumati butun urush davomida ham Rossiya, ham Ukraina bilan munosabatlarni saqlab kelgan. Ukrainani qurol-yarog‘ bilan ta’minlagan va Rossiyaga qarshi sanksiyalar qo‘yishda G‘arb davlatlariga qo‘shilmaslikni tanlagan.
Xuddi shunday maktub Turkiyaning yirik sanoatchilar va tadbirkorlar biznes uyushmasi TUSAID’ga ham yuborildi, — deyiladi xabarda.
Bunday yozma ogohlantirishlar Turkiyani Rossiyaga qarshi xalqaro sanksiyalarga rioya qilishga majburlash uchun AQSH bosimi kuchayganidan dalolat beradi.
Avvalroq Turkiya Rossiyadan neft importini ikki baravar oshirgani haqida xabar berilgandi.
Izoh (0)