Россиялик машҳур сиёсатшуноснинг қизи ҳайдаб кетаётган машина портлатилди, у воқеа жойида ҳалок бўлди

Подмосковеда жамоат арбоби Александр Дугиннинг қизига тегишли автомобиль портлаб кетди, деб ёзади Asia Plus. Россия Тергов қўмитаси жамоат учун хавфли усулда амалга оширилган қотиллик ҳолати юзасидан иш очди.

Россия ОАВларига кўра, сиёсатшунос ва журналист Дарья Дугина бошқараётган йўлтанламас автомобиль Одинцово шаҳрида портлаб кетган, у воқеа жойида ҳалок бўлган. Унинг автомобилига ўрнатилган портловчи қурилма қуввати тротил эквивалентда 400 граммни ташкил этган. Бу ҳақда «ТАСС» ҳуқуқ-тартибот органларига таяниб маълум қилган.

Машина Дугиннинг ўзига тегишли бўлган. У 20 август куни кечки пайт 9 ларда юриб кетаётган вақтида портлаган. Портлаш сабаблари ҳақида расмий маълумот берилганича йўқ.

«Коммерсантъ» ёзишича, Александр Дугин ва қизи Дарья 20 август, шанба куни «Традиция» ватанпарварлик фестивалида қатнашган. Тадбирдан кейин улар турли автомобилларда жўнаб кетган.

Александр Дугин — файласуф ва сиёсатшунос бўлиб, «евросиёчилик», Россиянинг собиқ совет республикалари билан интеграциялашуви орқали ўта кучли давлат тузиш ғояларини илгари суради. Америка ОАВлари Александр Дугинни кўп бора «Путиннинг мияси» деб атаган.

У Украинага Россия қўшинлари киритилиши ва унинг деярли бутун ҳудудини босиб олишни ёқлаб чиққан. 2015 йил мартидан буён у Украинадаги воқеалар туфайли АҚШ санкцияалр рўйхатига киритилган. Бундан ташқари, Канада ва Австралия ҳам Дугинга қарши санкциялар жорий қилган.

Дарья Дугина отасининг ғоялари тарафдори бўлган ва у ҳам жамоатчилик фаолияти билан шуғулланган.

Запорожье вилояти ҳарбий-фуқаролик маъмурияти аъзоси Владимир Рогов ва ДХР раҳбари Денис Пушилин ҳодисада «украиналик террорчилар» қўли борлигини, улар аслида Александр Дугинни нишонга олганини айтди.

Россия Ташқи ишлар вазирлиги вакили Мария Захарова воқеа юзасидан изоҳ берар экан, агар қотилликда «Украинанинг қўли борлиги» ҳақидаги версия ваколатли органлар томонидан тасдиқланса, «Киев томонидан амалга оширилаётган давлат терроризми сиёсати» ҳақида гапириш керак бўлишини айтди.

Украина президенти офиси ҳодисага алоқадорлигини рад этмоқда.

«Таъкидлаб ўтаман, Украина, шубҳасиз, бунга алоқадор эмас, чунки биз Россия Федерацияси каби жиноят давлати эмасмиз, устига-устак террорчилик давлати ҳам эмасмиз», — деди президент офиси раҳбари Михаил Подоляк.

Дарья Дугина 1992 йилда туғилган, Москва давлат университетининг фалсафа факультетини битириб, отаси раҳбарлик қилувчи «Халқаро Евросиё ҳаракати»да сиёсий шарҳловчи бўлиб ишлаган.