Россияда ЙТҲ оқибатида 16 киши ҳалок бўлди, уларнинг 14 нафари — Қирғизистон фуқаролари

Россиянинг Ульяновск вилоятида Новоспасское ва Николаевка аҳоли пунктлари оралиғидаги М-5 трассасида Mercedes микроавтобуси ва иккита юк автомобили тўқнашиб кетди. Оқибатда 16 киши ҳалок бўлиб, 22 киши жабрланди. Жароҳатланганлар оғир аҳволда касалхонага ётқизилган. Бу ҳақда ФВВ ҳудудий бошқармасига таяниб Meduza хабар бермоқда.

ФВВ хабарида айтилишича, ЙТҲ оқибатида одамлар жабрланган. Уларнинг сонига аниқлик киритилмаяпти. Ульяновск вилояти ИИВБ аварияда 16 киши ҳалок бўлган, яна уч киши оғир аҳволда касалхонага ётқизилган.

«Интерфакс»нинг фавқулодда хизматлардаги манбаси айтишича, юк машиналари 20 кишини олиб кетаётган микроавтобусни «том маънода эзиб юборган».

Кейинроқ маълум бўлишича, ҳалок бўлганларнинг 14 нафари Қирғизистон фуқаролари бўлган, қолган икки нафари — Россия фуқаролари.

Қирғизистон президенти Садир Жапаров Ташқи ишлар вазирлиги, Фавқулодда вазиятлар вазирлиги ва «Манас» халқаро аэропортига ЙТҲда ҳалок бўлган ватандошларнинг жасадларини Қирғизистонга юбориш учун махсус борт ташкиллаштиришни топширди.

Полиция маълумотларига кўра, юк машинаси ҳайдовчиси ўз вақтида тўхташга улгурмай қолган ва йўлнинг таъмирланаётган қисмида реверсив ҳаракат полосасида ўз навбатини кутаётган автобусга бориб урилган. Микроавтобус иккита юк машинаси ўртасида қисилиб қолган.

ЙТҲда фуқаролар ҳалок бўлиши ҳолати юзасидан Россия Жиноят кодексининг «Йўл ҳаракати ва транспорт воситаларидан фойдаланиш қоидалари бузилиши» моддаси бўйича жиноят иши қўзғатилди.