Хитой Халқ озодлик армияси Ҳиндистон, Беларусь, Монголия, Тожикистон ва бошқа мамлакатлар билан бир қаторда «Восток-2022» стратегик ҳарбий ўқув машғулотларида қатнашади. Бу ҳақда ХХР Мудофаа вазирлиги маълум қилди, деб ёзади Meduza.
Хитойнинг қўшма машғулотларда қатнашиши «жорий халқаро ва минтақавий вазият билан боғлиқ эмас», балки Россия билан ҳамкорлик ҳақидаги икки томонлама келишувнинг бир қисми ҳисобланади, дейилади Хитой Мудофаа вазирлиги хабарида.
Июль ойида Россия Мудофаа вазирлиги 30 августдан 5 сентябрга қадар уруш бошланганидан буён биринчи марта «Восток-2022» кенг кўламли стратегик машғулотлар ўтказишини эълон қилган эди. Россия идораси Шарқий ҳарбий округдаги машқларда шу жумладан, «бошқа давлатлар ҳарбий контингентлари» ҳам иштирок этишини таъкидлаган, бироқ айнан қайси давлатлар эканига аниқлик киритмаган эди.
Бундай ҳарбий машғулотларнинг сўнггиси 2018 йилда бўлиб ўтган. Ўшанда Хитой биринчи марта қатнашган эди.
АҚШ Давлат департаменти вакили Нед Прайс брифинг чоғида Хитой Россия ҳудудидаги «Восток-2022» ҳарбий ўқув машқларида қатнашиши ҳақидаги маълумотни изоҳлади. Унинг айтишича, қўшма машғулотлар ўтказиш — Россия ва Хитойнинг суверен қарорлари.
«Тушунишимча, бу Россия ва Хитойдан ташқари бир қатор мамлакатлар қатнашадиган қўшма машғулотлар. Мамлакатлар мунтазам равишда ўз суверен қарорларини қабул қилади. Бу уларнинг мутлақ ҳуқуқи», — деди у.
Шунингдек, Прайс маълум қилишича, АҚШ Украинадаги махсус операциялар юзасидан Хитой томонидан Россияга ҳарбий ёрдам берилиши белгиларини кўрмаган. ХХР, унинг айтишича, Россияга Ғарб санкцияларини айланиб ўтишда ёрдамлашгани йўқ.
Изоҳ (0)