Канада Украинага қиш мавсуми олдидан ёнилғи сотиб олиш учун 450 миллион Канада доллари (348,6 миллион доллар) миқдорида кредит беради. Бу ҳақда Канада ҳукумати сайтида хабар қилинган.
«Украинага қиш мавсуми олдидан иситиш учун ёнилғи сотиб олишга ёрдам берадиган 450 миллион доллар кредит ажратилишини ҳисобга олиб, биз шу кунгача ўз зиммамизга олган барча кредит мажбуриятларимизни бажардик», — дея Канада бош вазири ўринбосари ва молия вазири Христи Фриланднинг сўзлари келтирилган хабарда.
Ушбу сумма билан бирга Канаданинг йил бошидан бери Киевга ажратган кредитлари умумий ҳажми 1,95 миллиард Канада долларига (1,51 миллиард доллар) етади. Умуман олганда, Канада Украинага 3,4 миллиард Канада доллари (2,63 миллиард доллар) миқдорида ёрдам кўрсатди.
Украина газ сотиб олиш учун Канададан 12,7 млрд гривна (350 млн доллар) қарз олишни режалаштираётгани ҳақида ўтган ҳафта Олий Рада депутати Ярослав Железняк хабар берган эди. Унга кўра, кредит 1,6 фоиз билан ўн йилга мўлжалланган.
Мавзуга доир: Канада мудофаа вазири мамлакатда 33 мингдан ортиқ украиналик аскарни тайёрлаганини айтди
Изоҳ (0)