Ижтимоий тармоқларда мактабгача таълим муассасаси тарбияланувчисининг юз қисмида қизариб куйиш аломатлари мавжудлиги бўйича хабар тарқалди. Тошкент шаҳар Ички ишлар бош бошқармаси ҳолатга муносабат билдирди.
Қайд этилишича, 10 август куни Чилонзор тумани ИИО ФМБ навбатчилик қисмидан тушган хабарга кўра, Чилонзор туманида жойлашган хусусий мактабгача таълим муассасаси тарбияланувчиси М.А. (2019 йилда туғилган) қаровсиз қолган вақтида аёллар сумкасида бўлган аёлларни кўзга суртувчи бўёғини ўйнаб юз қисмига суртган.
Бу ҳолатни ушбу ташкилотда тарбиячи бўлиб ишловчи З.А. (38 ёшли) кўриб қолиб, болани юзини тозалаш мақсадида тиббий воситалардан суртган.
Оқибатда вояга етмаган боланинг юз қисми қизариб, куйиш аломатлари мавжудлиги сабабли тиббиёт муассасасига мурожаат қилинган. Боланинг олган тан жароҳатини аниқлаш мақсадида суд-тиббий экспертизаси тайинланган.
Ҳозирги кунда Чилонзор тумани ИИО ФМБ томонидан терговга қадар текширув ишлари олиб борилмоқда.
Изоҳ (0)