Ўзбекистон Давлат экология қўмитаси ва Германия халқаро ҳамкорлик жамияти (ГИЗ) ўртасида иқлим ўзгариши бўйича грант лойиҳасини амалга ошириш тўғрисида битим имзоланди, деб хабар бермоқда Дунё ахборот агентлиги.
Қайд этилишича, Марказий Осиёда иқлим хавфларини бошқариш минтақавий лойиҳаси Ўзбекистон, Қозоғистон, Тожикистон, Қирғизистон ва Туркманистонда амалга оширилиши режалаштирилган.
Лойиҳанинг умумий қиймати 10 миллион еврони ташкил этиб, Германия Иқтисодий ҳамкорлик ва тараққиёт федерал вазирлиги томонидан молиялаштирилади ҳамда 2022—2026 йилларда имплементация қилинади.
Лойиҳа Германия халқаро ҳамкорлик жамиятининг (ГИЗ) «Яшил Марказий Осиё» минтақавий дастури доирасида ишлаб чиқилган.
Тадбирда Ўзбекистон иқлим кун тартибининг энг муҳим жиҳати «яшил» иқтисодиётга босқичма-босқич ўтиш эканлиги қайд этилган. Экспертларнинг таъкидлашича, иқтисодиётнинг энергия самарадорлигини ошириш, углеводородлардан фойдаланишни қисқартириш, қайта тикланадиган энергия манбалари улушини ошириш чора-тадбирлари амалга оширилмоқда. Шундай қилиб, 2030 йилга келиб энергия самарадорлиги кўрсаткичи икки баравар ошиши ва ялпи ички маҳсулотнинг углерод истеъмолини пасайиши кутилмоқда.
Лойиҳанинг ҳаётга тадбиқ этилиши Давлат экология қўмитаси ҳамда иқлим ўзгариши соҳасидаги давлат идоралари мутахассислари учун кадрлар салоҳиятини институционал мустаҳкамлаш ва ривожлантиришни қўллаб-қувватлашга, Марказий Осиё мамлакатлари билан иқлим кун тартиби бўйича ҳамкорликни йўлга қўйишга ва ўзаро трансчегаравий ҳамкорликни мустаҳкамлашга ёрдам беради. Шу билан бирга, халқаро молия институтлари ва бошқа халқаро ташкилотларга молиялаштириш учун лойиҳа таклифларини ишлаб чиқишда кўмаклашади.
Изоҳ (0)