Ўзбекистонда январь—июль ойларида тадбиркорларнинг қонуний фаолиятига тўсқинлик қилиш билан боғлиқ 224 та ҳуқуқбузарлик фош этилди

Иқтисодий жиноятларга қарши курашиш департаменти 2022 йилнинг январь—июль ойларида тадбиркорларнинг қонуний фаолият юритишига тўсқинлик қилиш ҳамда уларнинг ҳуқуқ ва манфаатларининг қўпол бузилиши билан боғлиқ 224 та ҳуқуқбузарликни фош этди.

Хусусан, 35 та давлат ва бошқарув органлари, 32 та тижорат банклари, 18 та коммунал хизмат кўрсатиш корхоналари, 3 та назорат органлари ва 136 та бошқа идоралар мансабдор шахсларининг тадбиркорлар манфаатларига қарши қаратилган ҳуқуқбузарлик ҳолатларининг олди олиниши таъминланган.

Ўтказилган учрашувлар ҳамда қабуллар давомида 1 300 дан ортиқ тадбиркорнинг муаммолари қонуний тартибда ҳал этилган.

Кўрсатилган амалий кўмак натижасида 34 та ҳолатда тадбиркорлик субъектларига 33,6 миллиард сўм кредитлар ажратиб берилган. 8 та ҳолатда электр энергияси, табиий газ ва ичимлик суви тармоқларига уланиш, 52 та ҳолатда рухсатнома ва лицензиялар олиш ҳамда 1 209 та бошқа ҳолатларда амалий ёрдамлар кўрсатилган.

Норасмий равишда тадбиркорлик билан шуғулланаётган ҳамда рақобат муҳитига салбий таъсир кўрсатаётган 345 нафар шахснинг давлат рўйхатидан ўтказилиши орқали 375 та янги иш ўринлари ташкил этилишига эришилган.