Жаҳон соғлиқни сақлаш ташкилоти (ЖССТ)нинг бир гуруҳ экспертлари маймунчечак вируси вариантларига янги номлар ҳақида келишиб олди, деб ёзади «РБК». Энди вариантлар Рим рақамлари билан ифодаланади.
Шу тариқа, Конго ҳавзаси (Марказий Африка) варианти энди I клада (вариант), Ғарбий Африка варианти эса II клада деб аташ ҳақида келишиб олинди.
Июль охирида Нью-Йорк соғлиқни сақлаш комиссари Эшвин Васан ЖССТ раҳбари Тедрос Гебрейесусдан маймунчечакка янги ном беришни сўраган эди. Бу ном, унинг фикрича, бир қатор ирқлар вакилларига, масалан, қора танлиларга оғир ботиши мумкин.
Маймунчечак — шу номли вирус келтириб чиқарувчи касаллик. Симптомлари — безгак, кучли бош оғриғи, мушаклар ва белдаги оғриқ, ҳолсизлик, лимфа безларининг катталашуви ҳамда терида тошмалар ёки яралар пайдо бўлишидан иборат.
Одамнинг маймунчечакка чалиниши билан боғлиқ биринчи ҳолат 1970 йилда Конго Демократик Республикасида тўққиз ёшли ўғил болада қайд этилган, у ерда табиий чечакка 1968 йилда барҳам берилганди. Ўшандан буён касалланиш ҳолатларининг аксарияти Марказий ва Ғарбий Африка мамлакатларига тўғри келади.
Май ойида маймунчечак эндемик бўлмаган (ушбу касаллик хос бўлмаган) мамлакатларда авж ола бошлади. ЖССТ маълумотларига кўра, ҳозиргача бутун дунёда 31,6 мингдан ортиқ одам вирусни юқтириб, 12 киши вафот этган.
23 июль куни ЖССТ инфекция тарқалишини жамоат соғлиғини сақлаш соҳасидаги фавқулодда вазият деб эълон қилди.
Изоҳ (0)