Перу полицияси ва прокуратураси Лимадаги президент саройида тинтув ўтказди, деб хабар бермоқда Deutsche Welle.
Нашрнинг ёзишича, ҳуқуқ-тартибот идоралари Перу президентининг келини Енифер Паредесни коррупция ва пул ювишда айблаб, ҳибсга олиш учун ордерга эга бўлганидан кейин тинтув ўтказган.
Рейд президент Педро Кастилё томонидан қаттиқ танқид қилинди ва у Бош прокуратурани мамлакатдаги «конституциявий ва демократик тузумни бузиш»да айблади.
Конституциявий ва демократик тузумни бузишга интилаётганлар менинг сайловимни тан олмаслик учун сайловда мавжуд бўлмаган сохталикларни даъво қилган ўша одамлардир», — деган президент Кастилё.Шунингдек, у қароргоҳидаги тинтувни «ноқонуний» деб атаган.
Полициянинг бундай операцияси мамлакатда мисли кўрилмаган дея тарифланди. Қидирув деярли тўрт соат давом этди, бироқ агентлар қочиб юрган Паредесни топа олмадилар. У президентнинг яшаш жойи бўлган Кажамаркадаги канализацияни тозалаш лойиҳасида ноқонуний иштирок этганликда айбланиб, тергов қилинмоқда.
26 ёшли аёл ҳукумат саройидаги президент қароргоҳида Кастилё ва унинг оиласи билан яшаган. У июль ойи ўрталарида прокуратура ва Перу Конгресси қўмитаси олдида гувоҳлик беришга чақирилган эди.
Пойтахтнинг бошқа ҳудудларида бир вақтнинг ўзида яна бир қанча суд рейдлари ўтказилиб, шаҳар ҳокими ва икки тадбиркор худди шу коррупция тармоғига алоқадорликда айбланиб ҳибсга олинган.
Изоҳ (0)