Атом энергияси бўйича халқаро агентлик (МАГАТЭ) бош директори Рафаэль Гросси БМТ Хавфсизлик кенгашининг Запорожье атом электр станциясидаги вазиятга бағишланган йиғилишида нутқ сўзлаётиб, ҳозир жанговар ҳаракатлар туфайли ядровий хавфсизликка бевосита таҳдид йўқлигини маълум қилди, деб ёзади «РБК».
«Украина томонидан тақдим этилган энг янги ахборотга таянган ҳолда, МАГATЭ экспертлари ўққа тутишлар ёки яқинда бўлиб ўтган бошқа ҳарбий ҳаракатлар натижасида ядровий хавфсизликка фавқулодда таҳдид йўқ, деган дастлабки хулосага келди», — деди у ва вазият исталган лаҳзада ўзгариши мумкинлиги ҳақида огоҳлантирди.
Гросси Россия ва Украинани ташкилот билан ҳамкорликка чақирди ва МАГATЭ миссиясини иложи борича тезроқ Запорожье АЭСга киритиш зарурлигини, бу станция хавфсизлигини таъминлаш имконини беришини айтди.
МАГATЭ раҳбари сўзларига кўра, ташкилот атом станцияси ҳолати ҳақида Украина томонидан ҳам, Россия томонидан ҳам маълумот олган, аммо унинг таъкидлашича, ташкилот экспертлари вазиятни баҳолай олиши учун ядро объектига ўзлари бориб кўриши керак. Гросси миссияга ўзи раҳбарлик қилишга тайёрлигини билдирди.
«Мен Запорожье АЭСдаги вазиятдан ҳамон жуда ташвишдаман ва яна такрорлайманки, ядровий хавфсизликни таҳдид остига қўювчи ҳар қандай жанговар ҳаракатлар зудлик билан тўхтатилиши керак», — деди МАГATЭ раҳбари улар жиддий оқибатларга олиб келишини таъкидлар экан.
Запорожье АЭС — Европадаги энг йирик атом электр станцияси. У Энергодар шаҳрида жойлашган. 28 февраль куни, Украинада ҳарбий операция бошланганидан кейин тўрт кун ўтиб, Россия Мудофаа вазирлиги Запорожье АЭС ҳудуди назорат остига олинганини маълум қилганди.
7 август куни Энергодар ҳарбий-фуқаролик маъмурияти Украина қўшинлари тунда Запорожье АЭСга «Ураган» баравар ўт очиш реактив тизимлари билан зарбалар берганини маълум қилди. Ракета парчалари ишлаб турган энергоблок яқинига келиб тушгани даъво қилинди. Россия Мудофаа вазирлиги маълумотларига кўра, АЭС ва Энергодар ҳудудига Украина томонидан 152 миллиметр калибрли 20 та снаряд отилган.
«АЭСда 3-энергоблок қурилмаларининг бир қисми токдан узилиб қолди, 4-энергоблок ишлаб чиқараётган қувват камайди, водород қувурига зарар етди, водород станциясида водороднинг аланга бўлиб ёниши юз берди», — деб Россия мудофаа идораси электр станциясига етган зарарни изоҳлаган эди.
Аввалроқ Россия ҳукумати Халқаро атом энергияси агентлиги (МАГATЭ) раҳбариятига делегациянинг АЭСга ташрифини ташкиллаштиришда ёрдам беришга тайёрлигини билдирган эди. БМТ бош котиби Антониу Гутерриш МАГATЭ инспекторларига электр станциясига кириш имкониятини беришга чақирган ва унга берилган зарбаларни «ўз жонига қасд қилиш» деб атаган эди. Айни вақтда Россия ТИВ БМТ котибиятини ташрифга тўсқинлик қилишда айбламоқда (МАГATЭ БМТ раҳбарлиги остида ишлайди).
Россия томони Запорожье АЭСнинг Украина томонидан давомли ўққа тутилиши глобал техноген ҳалокатга олиб келиши мумкинлиги, станция хавф остида тургани ҳақида огоҳлантирди ва АЭС ўққа тутилиши юзасидан БМТ Хавфсизлик кенгаши мажлисини ўтказишни талаб қилди.
Изоҳ (0)