Ўзбекистонда глобал индекслар машҳурлик рейтинги ишлаб чиқилди. Бу ҳақда Прогнозлаштириш ва макроиқтисодий тадқиқотлар институти хабар бермоқда.
Таҳлилда охирги 5 йилда Google платформасида рейтингларга қизиқиш суръатининг ўзгариши асос қилиб олинди.
Google Trends ёрдамида қайси сўзлар тез-тез изланаётганини аниқлаш мумкин. Бу восита бутун дунё бўйлаб кўплаб бизнес вакиллари ва тадқиқотчилар учун муҳим манбага айланди.
Google браузери бугун сайёрадаги энг кўп ишлатиладиган қидирув тизимидир. NetMarketShare маълумотларига кўра, Google браузери 2018 йил декабрь ойида компьютер ва мобил қурилмаларда мос равишда 77 фоиз ва 86 фоиз улушга эга бўлган.
Шу сабабли Google Trends Интернет қидирувларни ишончли ҳолатда акс эттиради. Google ушбу воситани 2006 йил май ойида ишга туширди ва 2008 йил август ойида Google Search Insight деб номланган кенгайтмани чиқарди. 2012 йилда иккала восита Google Trends’нинг жорий версиясини яратиш учун бирлаштирилди.
Натижалар шуни кўрсатдики, машҳурлик рейтингида танлаб олинган индекслар ичида Инсон тараққиёти индекси якка пешқадам.
Бу, биринчидан, мазкур индексдан кенг жамоатчилик ривожланишнинг муқобил кўрсаткичи сифатида фойдаланиши билан боғлиқ. Иккинчидан эса, бошқа кўп рейтингларни ҳисоблашда бу индексдан асос сифатида фойдаланилади.
Иккинчи ўринда Демократия индекси турибди. Бу ҳозирги кунда демократик қадриятлар умуминсоний қадриятлар ичида энг устивор ўринга эга эканлиги билан боғлиқ бўлиши мумкин.
Учинчи ўрин Глобал инновациялар индексига тегишли. Ҳозирги кунга келиб ривожланишнинг асоси сифатида табиий ресурсларнинг ўзи эмас, балки улардан самарали фойдаланиш масаласи кўрилаётганини ҳисобга олсак мамлакатларнинг инновацион ривожланиш ҳолати кўпчиликни қизиқтириши аниқ.
Кейинги ўринларни Глобал рақобатбардошлик индекси, Иқтисодий эркинлик ва Глобал бошқарув индекси эгаллаган. Бу индекслар кенг қамқовли ҳисобланиб, ривожланишнинг жуда кўп йўналишларини бир рақамда акс эттиришга ҳаракат қилади.
Давлат риск баҳоси, Инклузив ўсиш индекси, Жаҳон матбуот эркинлиги индекслари машҳурликда энг ортда бормоқда. Демакки, бирор бир индекс матбуотда кенг эътироф этилаётгани унинг ҳақиқатдан ҳам муҳим эканлигини билдирмайди.
Табиийки, икки индексдан бирига эътибор қаратиш лозим бўган пайтда, албатта, машҳурроғига эътибор бериш тўғрироқ бўлади.
Умуман олганда, ҳуқуқ, коррупцияга оид индекслар саноат, иқтисодий барқарорлик ва электрон ҳукумат индексларидан машҳурликда устунроқ эканлиги аниқланди.
Индексларнинг кўп сонлиги ва ресурсларнинг чекланганлигини инобатга олиб мамалакатнинг ҳолати яхшилаш ишлари бу индексларнинг машҳурлик рейтингидан келиб чиқиб амалга оширилиши керак.
Изоҳ (0)