Ўзбекистон саноат экспортининг диверсификация даражаси баҳоланди. Бу ҳақда Прогнозлаштириш ва макроиқтисодий тадқиқотлар институти хабар бермоқда.
2010-2021 йиллар оралиғини баҳолаш натижалари:
Саноат маҳсулотлари экспорт диверсификацияси индекси 4,82 дан 5,76 гача кўтарилган.
2010 йилда саноат маҳсулотлари экспортининг ярми минерал ёқилғи ва пахтанинг ҳиссасига тўғри келган бўлса, 2021 йилда ушбу маҳсулотлар улуши 22 фоизни ташкил этди.
Кимё ва фармацевтика маҳсулотлари экспорт диверсификацияси индекси ҳам экспортда ўғитлар улушининг 78,5 фоиздан 43 фоизга камайиши ва бир қатор бошқа товарлар экспорти ҳажмининг ошиши ҳисобига 1,56 дан 2,76 гача ўсди.
Тўқимачилик маҳсулотлари ва кийим-кечак гуруҳи экспорт диверсификацияси даражасининг 1,21 дан 2,34 гача ўсиши пахта экспорти ҳажмининг сезиларли даражада камайиши ва унинг экспортдаги улуши қисқариши ҳамда қайта ишлаш даражаси юқори бўлган маҳсулотлар улушининг ошиши билан боғлиқ.
Чарм-пойабзал саноатида экспорт диверсификацияси индекси 1,67 дан 2,44 гача ошди.
2010 йилда товар гуруҳи экспортининг 75 фоизи хом ашёнинг улушига тўғри келган бўлса, 2021 йилда тайёр чарм маҳсулотлари экспорти ҳажмининг ошиши ҳисобига 43 фоизни ташкил этди.
Машинасозлик маҳсулотлари экспорт диверсификацияси индекси 2,04 дан 2,59 гача ошди.
Экспортда ерусти транспортининг улуши камайди, электр машиналар ва ускуналар, механик асбоб-ускуналар ва шунга ўхшаш қурилмалар улуши ошди.
Изоҳ (0)