ОФК 2026 йилги Жаҳон Чемпионати саралаш босқичи форматини эълон қилди

Осиё футбол конфедерацияси (ОФК) ЖЧ—2026 саралаш босқичи форматини расман эълон қилди. 48 та жамоа иштирок этадиган мундиалга ОФК минтақасидан 8 (+0,5) ўрин ажратилган.

Биринчи саралаш босқичида ФИФА рейтингидаги энг ёмон натижа кўрсатган 22 жамоа қуръага кўра 11 та жуфтликка бўлиниб, уй-сафар тизимида ўйнайди. Ғолиблар иккинчи босқичга йўл олади.

Иккинчи босқичда 36 та жамоа (25 та рейтингдаги энг яхши ва биринчи босқичнинг 11 та ғолиби) ҳар бир гуруҳда 4 тадан жамоа бўлган 9 та гуруҳга ажратилади. Учинчи босқичга ҳар бир гуруҳдан иккитадан, жами 18 та терма жамоа йўл олади

Ушбу 18 та жамоа учинчи босқичда учта гуруҳга бўлинади — ҳар бир гуруҳда 6 тадан терма жамоа ўрин олади. Ҳар бир гуруҳдан энг яхши иккита ўринни эгаллаган жамоалар (6 та) тўғридан-тўғри ЖЧ—2026 финал босқичига йўл олади.

Финал турнирида қолган 2 та ўрин ва Минтақалараро плей-оффдаги бир ўрин учун кураш тўртинчи босқичда кечади. Учинчи босқич гуруҳларидаги 3 ва 4-ўринни эгаллаган олти терма жамоа икки гуруҳга ажратилади. Гуруҳ ғолиблари тўғридан-тўғри финал босқичига йўл олса, иккинчи ўринни эгаллаган терма жамоалар Минтақалараро плей-офф йўлланмаси учун ўзаро курашади.

Саралаш босқичи 2023 йилнинг октябрь ойида бошланади ва 2025 йилнинг ноябрь ойига қадар давом этади. Ўзбекистон терма жамоаси 2-саралаш босқичидан ўз иштирокини бошлайди.

Эслатиб ўтамиз, 2026 йилги Жаҳон Чемпионатига АҚШ, Канада ва Мексика биргаликда мезбонлик қилади.