Osiyo futbol konfederatsiyasi (OFK) JCH—2026 saralash bosqichi formatini rasman e’lon qildi. 48 ta jamoa ishtirok etadigan mundialga OFK mintaqasidan 8 (+0,5) o‘rin ajratilgan.
Birinchi saralash bosqichida FIFA reytingidagi eng yomon natija ko‘rsatgan 22 jamoa qur’aga ko‘ra 11 ta juftlikka bo‘linib, uy-safar tizimida o‘ynaydi. G‘oliblar ikkinchi bosqichga yo‘l oladi.
Ikkinchi bosqichda 36 ta jamoa (25 ta reytingdagi eng yaxshi va birinchi bosqichning 11 ta g‘olibi) har bir guruhda 4 tadan jamoa bo‘lgan 9 ta guruhga ajratiladi. Uchinchi bosqichga har bir guruhdan ikkitadan, jami 18 ta terma jamoa yo‘l oladi
Ushbu 18 ta jamoa uchinchi bosqichda uchta guruhga bo‘linadi — har bir guruhda 6 tadan terma jamoa o‘rin oladi. Har bir guruhdan eng yaxshi ikkita o‘rinni egallagan jamoalar (6 ta) to‘g‘ridan to‘g‘ri JCH—2026 final bosqichiga yo‘l oladi.
Final turnirida qolgan 2 ta o‘rin va Mintaqalararo pley-offdagi bir o‘rin uchun kurash to‘rtinchi bosqichda kechadi. Uchinchi bosqich guruhlaridagi 3 va 4-o‘rinni egallagan olti terma jamoa ikki guruhga ajratiladi. Guruh g‘oliblari to‘g‘ridan-to‘g‘ri final bosqichiga yo‘l olsa, ikkinchi o‘rinni egallagan terma jamoalar Mintaqalararo pley-off yo‘llanmasi uchun o‘zaro kurashadi.
Saralash bosqichi 2023-yilning oktabr oyida boshlanadi va 2025-yilning noyabr oyiga qadar davom etadi. O‘zbekiston terma jamoasi 2-saralash bosqichidan o‘z ishtirokini boshlaydi.
Eslatib o‘tamiz, 2026-yilgi Jahon Chempionatiga AQSH, Kanada va Meksika birgalikda mezbonlik qiladi.
Izoh (0)