Лионель Месси фаолиятидаги совринлар сонини 41 тага етказди. Фақат бир футболчи бу борада ундан олдинда

Лионель Месси «ПСЖ» сафида Франция Суперкубогида ғалаба қозонди.

Аргентиналик ҳужумчи парижликларнинг мавсумдаги илк голига муаллифлик қилди. Бундан ташқари бу Лео учун финалларда урилган 32-голга айланди.

Месси фаолиятидаги 41-совринини қўлга киритди ва Дани Алвес билан орадаги фарқни қисқартирди. Бразилиялик жами 46 та совринга эга чиққан.

Бунга қадар аргентиналик ҳужумчи «Барселона» сафида 10 марта Ла Лига, 4 марта Чемпионлар Лигаси, 8 марта Испания Суперкубоги, 7 марта мамлакат Кубоги, 3 мартадан клублар ўртасидаги Жаҳон чемпионати ва Европа Суперкубогида зафар қучган. «ПСЖ» билан эса Франция чемпионлигига эришган.

Аргентина терма жамоаси билан Америка Кубогини қўлга киритган, шунингдек, Олимпиада ва ёшлар ўртасидаги Жаҳон чемпионатида шоҳсупага кўтарилган.

Рекордчи Алвеснинг совринлари сони борасида икки хил статистика мавжуд. Баъзи манбаларда 46 та соврин кўрсатилган, аммо айрим маълумотларда Алвеснинг эришган совринлари 42 та экани қайд этилган.

2001 йилги Баия чемпионлиги ва Nordэсте Кубогидаги ғалаба сўроқ остида қолмоқда. Ўшанда Алвес «Баия» сафида ўйнаган. Бундан ташқари 2018 йилги Франция Суперкубоги ҳам ҳисобга киритилмаган, чунки Алвес ўша ўйинда «ПСЖ» қайдномасидан жой олмаган. Шунингдек, Данининг 2003 йилги ёшлар ўртасидаги Жаҳон чемпионатида Бразилия билан чемпионлиги ҳам ҳисобга кирмайди деган тахминлар мавжуд.