АҚШнинг Нью-Йорк штати губернатори Кэти Хочул маймунчечак авж олиши туфайли фавқулодда вазият режимини эълон қилди, деб ёзади «РБК» штат маъмурияти сайтига таяниб.
«Нью-Йорк штатида маймунчечак авж олиши ҳақидаги сўнгги маълумотлар билан танишиб чиққач, унга қарши кураш бўйича фаол саъй-ҳаракатларимизни кучайтириш учун табиий офат муносабати билан фавқулодда ҳолат эълон қиламан», — деди Хочул.
Унинг сўзларига кўра, АҚШда маймунчечак билан боғлиқ ҳолатларнинг ҳар тўртинчиси Нью-Йорк штатига тўғри келмоқда. Губернатор қайд этишича, маҳаллий ҳукумат вакцина етказиб беришни ошириш ва тестдан ўтказиш имкониятларини кенгайтириш устида ишламоқда.
Фармон маймунчечакка қарши вакцина олиш ҳуқуқига эга шахслар доирасини, шу жумладан, тез ёрдам ходимлари, фармацевтлар ва акушерлар доирасини кенгайтиришни кўзда тутади.
Америка Касалликлар назорати ва профилактикаси маркази маълумотларига кўра, АҚШда маймунчечак билан касалланишга оид жами 5189 та ҳолат аниқланган бўлса, шуларнинг 1345 таси Нью-Йорк штатида қайд этилган. Штат касалланиш даражаси бўйича етакчилик қилмоқда. Ундан кейинги ўринларда Калифорния (799), Иллинойс (419), Флорида (373), Техас (351) ва Жоржия (351) бормоқда.
Аввалроқ маймунчечак авж олиши муносабати билан АҚШ президенти Жо Байден бутун мамлакат бўйлаб фавқулодда вазият режимини киритиш имкониятини кўриб чиқаётгани хабар берилганди. 23 июль куни ЖССТ маймунчечакни бутун дунёда соғлиқни сақлаш соҳасидаги фавқулодда вазият деб эълон қилди.
Изоҳ (0)