Испания ва Бразилияда маймунчечакдан илк ўлим ҳолатлари қайд этилди

Испанияда бир киши маймунчечакдан вафот этди, бу Европада қайд этилган ушбу инфекция оқибатидаги биринчи ўлимдир, деб ёзади «Интерфакс».

Миллий эпидемилогик назорат тармоғи маълумотларига кўра, Испанияда 29 июль ҳолатига 4298 кишида маймунчечак тасдиқланган. Испания тасдиқланган ҳолатлар сони бўйича дунёда АҚШдан кейинги иккинчи ўринда туради. La Vanguardia нашри ёзишича, касалланганлар ҳақидаги маълумотлар одатда кечикиб етиб келади.

Испания Соғлиқни сақлаш вазирлиги аниқлик киритишича, маймунчечакка чалинган 135 нафар беморда асоратлар юзага келган. 120 бемор касалхонага ётқизилган, улардан бири вафот этган.

Ўлим ҳолати Валенсияда қайд этилган. Дастлабки маълумотларга кўра, бемор бирламчи инфекция оқибатида юзага келган энсефалит туфайли вафот этган.

Шунингдек, Бразилия Соғлиқни сақлаш вазирлиги ҳам мамлакатда маймунчечак оқибатидаги илк ўлим ҳолатини тасдиқлади.

Минас-Жерайс штати, Уберландия шаҳрида вафот этган беморнинг иммунитети паст бўлган.

Вазирликнинг сўнгги маълумотларига кўра, Бразилияда 978 кишида ушбу касаллик аниқланган, шуларнинг уч нафари болалар, икки нафари эса ўсмирлардир. Ҳолатларнинг аксарияти Сан-Паулу штатида қайд этилган.