Хитой армияси раҳбарияти «урушга тайёрланишга» чақирди

Хитой Миллий озодлик армияси раҳбарияти аскарларни «урушга тайёрланишга» чақирди, деб ёзади Tengrinews. Қисқа хабар ХХРнинг 80-сонли умумқўшин армияси Weibo-аккаунтига жойлаштирилди.

АҚШ Вакиллар палатаси спикери Нэнси Пелосининг Тайванга режалаштирилган ташрифи фонида иккита иероглифдан иборат «Урушга тайёрланинг!» деган пост 12 соат ичида 300 мингдан ортиқ лайк ва 19 мингта изоҳ тўплади.

Постга ёзилган изоҳда Хитой армияси вакиллари аниқлик киритишича, у Хитой Миллий озодлик армиясининг 95 йиллигига бағишланган постдир.

Ижтимоий тармоқ фойдаланувчиларининг кўпчилиги даъватни қўллаб-қувватлаб изоҳлар қолдирган. «Хитой Миллий озодлик армияси аскарлари, курашинг! Биз сизни қўллаб-қувватлаймиз, йигитлар», — дейилади улардан бирида.

Хитой армияси фахрийларининг баъзилари мамлакат уларга эҳтиёж сезса, армия таркибига қайтишга доим тайёрлигини маълум қилди. Айрим фойдаланувчилар эса Тайван бўғозининг икки томони тезроқ бирлашишини тилади.

Нашр эслатишича, аввалроқ ХХР раиси Си Цзиньпин АҚШ президенти Жо Байден билан телефон суҳбатида Хитой айирмачиликка ва «Тайвань мустақиллиги»га, шунингдек, ташқи кучларнинг ҳар қандай аралашувига қатъиян қарши чиқишини маълум қилганди.

Хитой ва АҚШ ўртасидаги кескин муносабатлар бир неча йилдан буён сақланиб қолмоқда. Чунончи, Дональд Трамп президентлиги даврида Вашингтон, шу жумладан, Тайвань масаласи туфайли Пекинга санкциявий босимни кучайтирганди. Тайвань атрофидаги вазият сўнгги вақтларда АҚШ вакиллар палатаси спикери Нэнси Пелосининг яқин орада оролга ташриф буюриш режаси сабабли кескинлашди.

Хитой АҚШ раҳбариятини бир неча марта ташрифдан воз кечишга чақириб, «ягона Хитой» сиёсатига содиқлик АҚШ зиммасига юклайдиган мажбуриятлар ҳақида эслатди.

Агар Пелосининг ташрифи амалга ошса, у 25 йил ичида Тайванга ташриф буюрган биринчи АҚШ конгресси палатаси спикерига айланади.

Шу билан бирга, АҚШ президенти ҳарбийлар ушбу ташаббусни мақбул деб ҳисобламаслигини айтди. CNN маълумотларига кўра, Оқ уй Хитой Пелосининг ташрифини чиппакка чиқариш учун Тайвань ҳаво ҳудудини парвоздан ташқари зона деб эълон қилишидан хавотирда. Шунингдек, Пекин оролга қирувчи самолётларни йўналтириши, бу эса Тайбэй ва Вашингтоннинг жавоб чораларига сабаб бўлиши мумкин.

ХХР Ташқи ишлар вазирлиги Пелосининг эҳтимолий ташрифига «жиддий тайёргарлик» кўраётганини маълум қилди.

Тайвань Хитойдан ажралиб чиққани ҳақида 1949 йилда, фуқаролар уруши даврида эълон қилган. Пекин оролнинг мустақиллигини тан олмайди ва уни ўз провинцияси деб ҳисоблайди. АҚШ оролда эълон қилинган Хитой республикаси билан дипломатик алоқалар ўрнатмаган бўлса-да, 1979 йилдан буён амал қилиб келувчи қонунга кўра, минтақага ўзини ҳимоялаш учун қурол етказиб бера олади.