AQSHning Nyu-York shtati gubernatori Keti Xochul maymunchechak avj olishi tufayli favqulodda vaziyat rejimini e’lon qildi, deb yozadi “RBK” shtat ma’muriyati saytiga tayanib.
“Nyu-York shtatida maymunchechak avj olishi haqidagi so‘nggi ma’lumotlar bilan tanishib chiqqach, unga qarshi kurash bo‘yicha faol sa’y-harakatlarimizni kuchaytirish uchun tabiiy ofat munosabati bilan favqulodda holat e’lon qilaman”, — dedi Xochul.
Uning so‘zlariga ko‘ra, AQSHda maymunchechak bilan bog‘liq holatlarning har to‘rtinchisi Nyu-York shtatiga to‘g‘ri kelmoqda. Gubernator qayd etishicha, mahalliy hukumat vaksina yetkazib berishni oshirish va testdan o‘tkazish imkoniyatlarini kengaytirish ustida ishlamoqda.
Farmon maymunchechakka qarshi vaksina olish huquqiga ega shaxslar doirasini, shu jumladan, tez yordam xodimlari, farmatsevtlar va akusherlar doirasini kengaytirishni ko‘zda tutadi.
Amerika Kasalliklar nazorati va profilaktikasi markazi ma’lumotlariga ko‘ra, AQSHda maymunchechak bilan kasallanishga oid jami 5189 ta holat aniqlangan bo‘lsa, shularning 1345 tasi Nyu-York shtatida qayd etilgan. Shtat kasallanish darajasi bo‘yicha yetakchilik qilmoqda. Undan keyingi o‘rinlarda Kaliforniya (799), Illinoys (419), Florida (373), Texas (351) va Jorjiya (351) bormoqda.
Avvalroq maymunchechak avj olishi munosabati bilan AQSH prezidenti Jo Bayden butun mamlakat bo‘ylab favqulodda vaziyat rejimini kiritish imkoniyatini ko‘rib chiqayotgani xabar berilgandi. 23-iyul kuni JSST maymunchechakni butun dunyoda sog‘liqni saqlash sohasidagi favqulodda vaziyat deb e’lon qildi.
Izoh (0)