АҚШ Савдо вазирлигининг Иқтисодий таҳлил бюроси маълум қилишича, иккинчи чоракда АҚШ ялпи ички маҳсулоти (ЯИМ) ўтган йилнинг шу даврига нисбатан 0,9 фоизга камайди, деб хабар бермоқда «Коммерсантъ».
Бу ҳеч бўлмаганда минимал ўсишни кутган кўпчилик таҳлилчиларнинг прогнозларидан ҳам ёмонроқ.
ЯИМнинг пасайиши биринчи чоракда ҳам қайд этилгани сабабли кўплаб таҳлилчилар техник рецессия (кўрсаткичнинг кетма-кет икки чоракда пасайиши) ҳақида гапирмоқда.
АҚШ Савдо вазирлигида иккинчи чоракда ЯИМнинг қисқариши чакана савдо камомади, кўчмас мулкка инвестициялар ва давлат харажатларининг камайиши ҳисобига товар-моддий бойликларга хусусий инвестицияларнинг қисқариши билан изоҳланади.
Бироқ АҚШ президенти Жо Байден рецессия ҳақидаги тахминларга умуман ўрин йўқлигини таъкидлади.
Бизда бандлик даражаси рекорд даражада. Корхоналар АҚШга рекорд даражада сармоя киритмоқда. Америка саноати сўнгги ўттиз йилликдаги энг кучли тикланишни бошдан кечирмоқда. Бу умуман рецессия дегани эмас, — дейди Байден.
АҚШда ишсизлик ҳақиқатан ҳам паст (июнь ойида 3,6 фоиз) ва иккинчи чоракда иш ўринлари сони 1 миллион кишига ошди.
АҚШ молия вазири Жанет Елленнинг сўзларига кўра, 2021 йилда АҚШ иқтисодиёти тез ўсди (5,5 фоизга) ва ҳозирги вазият «зарурий пасайиш»дир.
S&P Global Ratings рецессия хавфи 40-50 фоизни ташкил қилади ва 2023 йилга яқинроқ ортади, деб ҳисобламоқда.
Истеъмолчиларнинг мазмунли харидлардан воз кечиши ва арзонроқ истеъмол муқобилларига ўтиши АҚШда инфляциянинг тезлашишини секинлаштиришга ёрдам бериши кераклиги таъкидланмоқда.
Таҳлилчиларнинг фикрича, Fed’нинг ставкаларни ошириш кетма-кетлиги АҚШ иқтисодий фаоллигининг учдан икки қисмидан кўпроғига тўғри келадиган истеъмол харажатлари ўсишининг янада секинлашишига олиб келади ва бу йирик рецессия хавфини оширади.
Изоҳ (0)