Ўзбекистон энг кўп олтин сотиб олган давлатлар учлигига кирди

Бутун дунё бўйлаб марказий банклар апрель—июнь ойларида олтин харид қилишни кучайтирган. Улар қаторида Ўзбекистон Марказий банки ҳам мавжуд. Бу ҳақда Бутунжаҳон Олтин кенгаши (WGC) хабар берди.

Марказий банклар ушбу 3 ойда глобал олтин захираларини 180 тоннага кўпайтирган.

Олтин сотиб олиш бўйича июнь ойида рекорд ўрнатилган — 164,4 тонна. Май ойида бу кўрсаткич 35 тоннага тенг эди. Апрель ойида эса — 19,4 тонна.

Апрель—июнь ойларида олтиннинг асосий харидори Ироқ бўлиб, захираларни деярли 34 тоннага кўпайтирди. Туркия 26,6 тонна харид билан кейинги ўринда.

Ўзбекистон Марказий банки учинчи ўринда — унинг олтин захиралари 26,44 тоннага ошган.

Шунингдек, Қозоғистон (15,8 тонна) ва Ҳиндистон (8,4 тонна) олтин сотиб олган.

1 июль ҳолатига кўра, Ўзбекистоннинг олтин-валюта захиралари 35,5 млрд долларни ташкил қилади.

Ривожланаётган мамлакатларга, шу жумладан, Ўзбекистонга ҳам халқаро ташкилотлар уч ойлик импортни молиялаштириш учун етарли бўлган захираларни сақлашни тавсия қилади.

35,4 млрд доллар ҳозир Ўзбекистонга 20 ойдан ортиқ импортни молиялаштириш учун етарли. Бундай кўрсаткич ишончли ҳисобланади.

Аввалроқ Ўзбекистон уч ойдан бери олтин сотмаётгани ҳақида хабар берилганди.