Европада йиллик инфляция рекорд даражага етди

Июль ойида евроҳудудда инфляция ўтган йилнинг шу даврига нисбатан рекорд даражадаги 8,9 фоизга етди. Бу ҳақда жума куни Европа статистика агентлиги Eurostat маълум қилди.

Агентлик маълумотларига кўра, ойлик кўрсаткичларда индекс июнь ойида 0,8 фоизга ўсганидан кейин 0,1 фоизга ошди.

Eurostat юқори инфляциянинг асосий сабабини энергия нархининг ошиши билан изоҳлаган. Энергия нархлари ўтган ойда 42 фоизга кўтарилганидан кейин йиллик кўрсаткичда 39,7 фоизни ташкил этди.

Озиқ-овқат, алкоголь ва тамаки маҳсулотлари май ойидаги 8,9 фоизга нисбатан июнь ойида 9,8 фоизга, саноат маҳсулотлари 4,3 фоиздан 4,5 фоизга ошди. Хизматлар нархининг ўсиши июнь ойида 3,4 фоиздан 3,7 фоизгача тезлашди.

Eurostat аниқлик киритишича, июнь ойида энг юқори инфляция Эстонияда кузатилган — 22 фоиз. Кейинги ўринларда Литва — 20,5 ва Латвия — 19,2 фоиз. 

Энг паст кўрсаткичлар Мальта ва Францияда қайд этилган – мос равишда 6,1 ва 6,5 ​​фоиз.

Бир йил аввал евроҳудудда инфляция йилига атиги 2,2 фоизни ташкил этган эди. Аммо ноябрь ойидан буён индикатор ҳар ой рекордларни янгилаб келмоқда.