Британияда денгиз сатҳи тезкорлик билан кўтарилмоқда

Буюк Британиянинг баъзи қисмларида денгиз сатҳи сўнгги 30 йил ичида ўтган аср бошига нисбатан камида икки карра кўтарилган, деб ёзади Anadolu Agency.

«Иқлим ҳолати» анъанавий ҳисоботида маълум қилинишича, мамлакатнинг айрим ҳудудларида денгиз сатҳи сўнгги 30 йил ичида 1900 йиллар бошидагига нисбатан камида икки марта тезроқ кўтарилган.

Ҳисоботда қайд этилишича, 1900 йиллар бошида денгиз сатҳининг ошиш суръатлари йилига 1,5 миллиметрни ташкил қилган, 1990 йиллардан бошлаб ушбу рақам йилига 3—5,2 миллиметрга тенг бўлган. Шу тариқа, сўнгги 30 йил ичида денгиз сатҳи 16,5 сантиметрга кўтарилган.

Ҳисоботни тайёрлаган мутахассислардан бири Светлана Евреева сўзларига кўра, денгиз сатҳининг ошишига Гренландия ва Антарктидадаги музликлар эриши сабаб бўлганини кўрсатувчи далиллар бор.

Ҳисоботда айтилишича, Буюк Британиядаги исиш даражаси дунё бўйича ўртача исиш суръатларидан анча баландроқдир.

Мамлакатдаги сўнгги 20—30 йил ўтган асрга нисбатан иссиқроқ, ёмғирлироқ ва қуёшлироқ бўлган.