Ерга иккита астероид яқинлашмоқда, уларнинг ҳар бири осмонўпар бинонинг ўлчамига тенг. Улар 29—30 июль кунлари сайёра ёнидан учиб ўтади, деб ёзмоқда Live Science.
2016 CZ31 деб номланган биринчи космик жисм 55 618 км/соат тезликда ҳаракатланмоқда. Астрономларнинг ҳисоб-китобларига кўра, астероиднинг эни тахминан 122 метрни ташкил этади, буни 40 қаватли бино билан солиштириш мумкин.
У 29 июль куни Ерга энг яқин келади ва 2,8 миллион километр масофада учади. Бу сайёрамиз ва Ой ўртасидаги ўртача масофадан етти баравар кўп. NASA маълум қилишича, ушбу космик тош Ерга бир неча йилда бир марта яқинлашади, кейинги бундай яқинлашув 2028 йилнинг январида кузатилади.
«NASA ва бошқа космик агентликлар Ерга яқин бўлган минглаб шунга ўхшаш объектларни диққат билан кузатиб бормоқда. Астероиднинг траeкторияси сайёрамиздан миллионлаб километр узоқликда бўлса ҳам, астероид орбитаси бироз ўзгариши мумкин. Бундай кичик силжиш келажакдаги парвоз пайтида астероиднинг Ер билан тўқнашувига олиб келиши мумкин», деб таъкидлайди Live Science.
Иккинчи астероид — 2013 CU83 30 июль куни Ер ёнидан 21 168 км/соат тезликда учиб ўтади. У биринчисидан каттароқ, диаметри 183 метр, сайёрага максимал 6,96 миллион километр яқинлашади. Бу сайёрамиз ва унинг сунъий йўлдоши орасидаги ўртача масофадан тахминан 18 баравар кўп.
Изоҳ (0)