Туркия президенти Ражаб Тоййиб Эрдўғоннинг айтишича, Россия президенти Владимир Путин унга Bayraktar дронларини ишлаб чиқарувчи Baykar компанияси билан ҳамкорлик қилиш истагини айтган.
«Путин менга Baykar билан ҳамкорлик қилмоқчи эканини айтди», — деди Эрдўғон ҳукмрон «Адолат ва тараққиёт» партияси марказий ижроия қўмитаси йиғилишида.
Унинг сўзларига кўра, Бирлашган Араб Амирликлари ҳам Bayraktar’га қизиқиш билдирган ва ўз ҳудудида дрон ишлаб чиқарадиган завод қуришни таклиф қилган.
Bayraktar-ТB2 учувчисиз учар аппаратлар Украина ҳарбийлари томонидан фаол қўлланилмоқда, бу эса Россия қўшинларига катта зарар етказгани айтилмоқда. Россия Мудофаа вазирлиги бундай дронлар йўқ қилинаётгани ҳақида мунтазам хабар беради. Вазирлик ҳисоботларига кўра, Украина армиясида фойдаланилган Bayraktar’лардан 20 га яқини йўқ қилинган.
Бир неча ҳафта олдин Россия Эрондан дрон сотиб олмоқчилиги ҳақида хабарлар тарқалган эди. Ҳар икки давлат расмийлари буни рад этди, бироқ Америка манбаларига кўра, Россия расмийлари июнь ва июль ойининг бошида Теҳрон жанубидаги аэродромга ташриф буюрган, у ерда россияликларга аниқ бошқариладиган ракеталарни олиб юришга қодир дронлар кўрсатилган.
Эслатиб ўтамиз, Эрдўғон ва Путин 5 август куни Россиянинг Сочи шаҳрида учрашиб, музокаралар ўтказиши хабар қилинганди.
Изоҳ (0)