АҚШ расмийлари Хитойнинг Тайванга нисбатан хатти-ҳаракатлари ва баёнотларидан тобора кўпроқ ташвишланмоқда, сўнгги кунларда Вакиллар палатаси спикери Нэнси Пелосининг оролга ташриф буюриш нияти туфайли вазият кескинлашди, Оқ уйдагилар махфий равишда уни сафардан қайтаришга уринмоқда. Бу ҳақда The New York Times манбаларга таяниб ёзмоқда.
Пелосининг Тайванга ташрифи можаро хавфини оширади, чунки яқин ҳафталарда Хитой раиси Си Цзиньпин ва Хитой Коммунистик партиясининг (ХКП) бошқа етакчилари ўртасидаги «муҳим сиёсий учрашув» бўлиб ўтади, дея таъкидлади АҚШ расмийлари. NYT газетаси бу қандай учрашув эканига аниқлик киритмаган, бироқ ХКПнинг 20-Конгресси 2022 йилнинг иккинчи ярмига белгиланган эди.
Газетанинг ёзишича, Пелоси катта эҳтимол билан Тайванга АҚШ ҳарбий самолётида учади, чунки бу шундай ташрифлар учун одатий ҳол. Бир қатор таҳлилчиларнинг фикрича, Хитой Америка самолётини кузатиб бориш ва унинг қўнишига халал бериш учун махсус самолёт жўнатиши мумкин, деб таъкидламоқда The New York Times. Газетага интервью берган АҚШ расмийларининг айтишича, бундай ҳаракатга хавотирли ва кескинликнинг жиддийлашиши деб қаралади, аммо айнан шу сценарий кузатилиши ҳозирча даргумон.
Reuters хабарига кўра, Пелоси Японияга ташрифидан сўнг, шу ҳафта Тайванга ташриф буюриш ниятида. Вакиллар палатаси спикерининг ўзи «Тайванни қўллаб-қувватлашини кўрсатиш» муҳимлигини айтиб, режаларига омма олдида изоҳ беришдан бош тортган. Оролга ташриф буюрган тақдирда, Пелоси 1997 йилдан бери 25 йил ичида Тайванга ташриф буюрган биринчи АҚШ Конгресси спикери бўлади.
Хитой ташқи ишлар вазирлиги Пелосининг эҳтимолий ташрифига «жиддий тайёргарлик кўрилаётгани» ҳақида маълум қилди, деб хабар беради Bloomberg. «Хитой томони Америка томонига спикер Пелосининг Тайванга эҳтимолий ташрифидан жиддий хавотиримизни ва бу ташрифга кескин қарши эканлигимизни бир неча бор билдирди», — деган вазирлик матбуот котиби Чжао Лицзян 25 июль куни бўлиб ўтган брифингда.
Financial Times нашрининг ёзишича, Хитой расмийлари шахсий равишда АҚШга Пелосининг оролга ташрифи оқибатлари ҳақида огоҳлантириш юборган, унда аввалгидан анча жиддийроқ таҳдидлар мавжуд. Мактуб матни ҳарбий жавобга сабаб бўла олади, деди газетага масаладан хабардор икки киши.
Изоҳ (0)