Саудия Арабистони 120 километр узунликдаги, кўзгули ойна билан қопланган Mirror Line осмонўпар биносини қуриш режасини эълон қилди. У чўлда қурилади ва мамлакатга 1 триллион долларга тушади. Mirror Line биноси Неом чўл шаҳрининг бир қисмига айланади — шаҳар ҳақида 2021 йилнинг январь ойида Саудия Арабистони валиаҳд шаҳзодаси Муҳаммад бин Салмон эълон қилганди.
Mirror Line баландлиги тахминан 500 метр бўлган иккита бинодан иборат бўлади, улар 120 километрли чўл, қирғоқ ва тоғ ландшафтлари орқали бир-бирига параллел равишда туради. Шаҳзода Муҳаммад қурилишни 2030 йилгача якунлаш ниятида, аммо муҳандислар бунга 50 йил кетиши мумкинлигини айтмоқда
Бино жуда узун бўлгани учун Ернинг эгрилигини ҳисобга олган ҳолда у тиргакларга ўрнатилади, унинг остидан эса тезюрар темир йўл линияси ўтади. Осмонўпар бино Ақаба кўрфазидан тоғ тизмаси ва қирғоқ орқали чўл «аэротрополиси»гача чўзилади.
Салмоннинг сўзларига кўра, лойиҳа аҳоли бир-бирига пиёда 5 дақиқада етиб бориши, шунингдек, 20 дақиқа ичида бинонинг бир четидан иккинчи четига ўтишига мўлжаллаб ишлаб чиқилган. Хабар қилинишича, Mirror Line қайта тикланадиган энергиядан қувватланади.
Wall Street Journal маълумотларига кўра, бинолар 5 миллион кишига мўлжалланган бўлиб, тезюрар поезддан ташқари, қайиқ причалини (кема, қайиқлар боғлаб қўйиладиган жой) ҳам ўз ичига олади.
Mirror Line, шунингдек, ердан тахминан 300 метр баландликда жойлашган стадионга эга бўлади. Салмоннинг таъкидлашича, бинолар бутунлай углероддан ҳоли ва экология учун хавфсиз бўлади. Шунингдек, у Неом лойиҳасининг ўзи минглаб янги иш ўринларини яратишига ва нефтга бой мамлакатнинг табиий ресурсларга қарамлигини камайтиришга ёрдам беришига умид қилмоқда.
Бироқ лойиҳа баъзи қийинчиликларга ҳам дуч келмоқда. Ғарб давлатлари ва Саудия ўртасидаги муносабатларда инсон ҳуқуқларининг бузилиши ҳақидаги даъволар билан боғлиқ муаммолар туфайли Неом хориждан сармоя олмаслиги мумкин. Баъзилар, шунингдек, ишлаб чиқилаётган лойиҳаларни жуда хаёлий, деб ҳисобламоқда.
Аввал молиялаштиришдаги қийинчиликлар туфайли Саудия Арабистони баландлиги 1,6 километр бўлган, дунёдаги энг баланд осмонўпар бинони қуриш режасидан воз кечган эди. Ҳозир Mirror Line ва Неом нефтнинг нархи ошиши ҳисобидан молиялаштирилмоқда.
Атроф-муҳитни режалаштириш бўйича мутахассилар Mirror Line кўчманчи қушларнинг миграция йўлларига тўсиқ бўлишидан, кўзгули бинолар уларни йўналишдан чалкаштириб юборишидан хавотирланмоқда.
Изоҳ (0)