АҚШ президенти Жо Байденнинг маъмурияти маймунчечак тарқалиши сабабли фавқулодда ҳолат жорий этиш масаласини кўриб чиқмоқда, деб ёзади The Washington Post вазиятдан хабардор учта аноним манбага таяниб.
ЖССТ маймунчечак эпидемиясини жамоат саломатлиги учун фавқулодда ҳолат деб эълон қилганидан сўнг, Оқ уй ва соғлиқни сақлаш агентлиги раҳбарлари вирусга қарши курашиш чораларини муҳокама қилиш учун йиғилиш ўтказди.
Йиғилишда расмийларнинг бир гуруҳи ҳукуматга вирус тарқалиши тўғрисидаги маълумотларни бюрократик тўсиқларсиз тўплаш имконини бериш учун фавқулодда ҳолат эълон қилишни талаб қилди. Яна бир гуруҳ амалдорларнинг таъкидлашича, бу ҳаракат рамзий маънога эга бўлади ва вакцина танқислиги муаммосини ҳал қилмайди. Йиғилганлар АҚШда фавқулодда ҳолат эълон қилиш асосли бўлишига шубҳа билдирди, чунки мамлакатда маймунчечакдан ҳали ҳеч ким ўлмаган.
АҚШ расмийлари фавқулодда вазият бўйича якуний қарорни шу ҳафтада чиқаришга умид қилмоқда.
Маълумот учун, маймунчечак кам учрайдиган вирусли касаллик бўлиб, асосан марказий ва ғарбий Африканинг чекка ҳудудларидаги тропик ўрмонлар яқинида учрайди. Ушбу касалликни ҳайвондан одамга юқтиришнинг биринчи ҳолати 1970 йилда Конго ҳудудида қайд этилган. ЖССТ маълумотларига кўра, бу вирус одамларга кемирувчилар ва ёввойи ҳайвонлардан юқади. Одатда, маймунчечак эпидемиясидан ўлим даражаси 1 фоиздан 10 фоизгачани ташкил этади. Ўлимлар асосан ёшлар орасида содир бўлади. Маймунчечакка қарши махсус эмлаш усули йўқ, аммо чечакка қарши эмлаш бу касалликдан 85 фоиз даражада ҳимоя қилади.
Изоҳ (0)