Ўзбекистон Республикаси Президентининг фармони билан Сардор Уктамович Умурзоқов Ўзбекистон Республикаси Президенти Администрацияси раҳбари лавозимига тайинланди ва шу муносабат билан Бош вазирнинг инвестициялар ва ташқи иқтисодий масалалар бўйича ўринбосари - инвестициялар ва ташқи савдо вазири лавозимидан озод этилди.
Сардор Умурзоқов 1977 йил 23 ноябрда Тошкентда туғилган. 1994-1998 йилларда Тошкент Давлат Иқтисодиёт Университетининг «Халқаро молия ва банк иши» факультетида олий таълим олган. Бакалавр дипломини олгандан сўнг,1998-1999 йилларда Рединг университетида (Буюк Британия) ўқиб, «Банк иши» ихтисослиги бўйича магистр даражасини олган.
2000—2003 йиллар банк соҳасида меҳнат фаолиятини Ўзбекистон Республикаси Ташқи иқтисодий фаолият Миллий банкида 2-тоифали мутахассис сифатида бошлаган. Бироз вақт ўтгач, у 1-тоифали мутахассис, сўнгра — етакчи мутахассис ва кейинчалик — Инвестицияларни бошқариш бўлими бошлиғи бўлиб ишлаган. 2003 йилда Ўзбекистон Республикаси Ташқи иқтисодий фаолият Миллий банки Самарқанд бўлими бошқарувчисининг ўринбосари этиб тайинланган.
2004 йилдан 2007 йилгача Лондонда яшаб, Европа тикланиш ва тараққиёт банкининг молиявий институтлари бизнес гуруҳининг катта банкири лавозимида ишлаган. Буюк Британиядан қайтгач, 2007 йилдан 2013 йилгача Ўзбекистон Республикаси Молия вазирлиги Ғазначилигида раҳбарлик лавозимларни эгаллаган: Тошкент шаҳар Ғазначилик бошқармаси бошлиғининг ўринбосари, сўнгра — бошлиғи, кейинчалик — Ўзбекистон Республикаси Молия вазирлиги Ғазначилиги бошлиғининг биринчи ўринбосари сифатида фаолият юритган.
2014 йилдан 2017 йилгача — «Ўзбекчармпойабзал» уюшмаси раисининг маслаҳатчиси. Кейинчалик (2017—2018 йилларда) ушбу уюшманинг Бошқаруви раисининг ўринбосари бўлиб ишлаган. Сўнгра, 2018—2019 йилларда «Ўзбекчармпойабзал» уюшмаси қайта ташкил этилиши натижасида янгидан тузилган «Ўзчармсаноат» уюшмасининг раиси лавозимида ишлаган.
2019 йил 28 январда Ўзбекистон Республикаси Президентининг Фармони билан Сардор Умурзоқов Ўзбекистон Республикаси Инвестициялар ва ташқи савдо вазири этиб тайинланган эди.
Изоҳ (0)