Американинг Starbucks қаҳвахоналар тармоғининг Россиядаги янги эгалари маълум қилинди. Бу ҳақда Forbes хабар бермоқда.
Унга кўра, Starbucks’нинг янги эгалари ресторатор Антон Пинский, Тимур Юнусов (Тимати) ва сенатор Арсен Каноковнинг Sindika компанияси бўлади.
Ресторан инвестори Александр Сйсоев биринчи бўлиб ўзининг Telegram-каналида қаҳвахоналар эгаси ўзгариши мумкинлиги ҳақида ёзди.
Сйсоевнинг сўзларига кўра, Пинский Starbucks’нинг аксарият қисмини эгаллаб олади ва ўзининг қаҳвахоналар тармоғини қуради.
Ресторан сотуви бўйича битим ой охири — 20 июль куни якунланиши керак эди.
Битим Starbucks’нинг маҳсулотлари ва технологияларидан фойдаланиш имкониятисиз қаҳвахоналар ҳамда Pushkino Park савдо марказидаги биноларни ижарага олиш ҳуқуқини ўз ичига олади.
Қаҳвахоналар тармоғининг янги эгаси уни ребренд қилишга мажбур бўлади, — дейилади хабарда.
Infoline-analytics бош директори Михаил Бурмистров Starbucks’нинг Россия бизнесини сотиб олиш бўйича битим миқдори сезиларли чегирма туфайли 700 миллион рублдан ошмаслигини таъкидлади.
Cоrе.хp чакана савдо бўлими бошлиғи Марина Малахатко уни битим тузилиши ва пакетга қараб 1,6-3 миллиард рубль оралиғида баҳолади.
Март ойида Starbucks ўз маҳсулотларини Россияга етказиб беришни тўхтатди ва қаҳвахоналарни ёпди. 23 май куни эса Россия бозорини тарк этишга қарор қилганини эълон қилди.
Компания Россияда 15 йил фаолият юритган. Ҳозирда мамлакат бўйлаб 130 та филиалга эга.
Изоҳ (0)