Инновацион ривожланиш вазирлиги Ўзбекистонда ишлаб чиқарилаётган «ақлли» светофорлар ҳақида маълумот берди.
«Ақлли» светофорлар Ўзбекистонда биринчи бўлиб Фарғона Политехника институти олимлари ёмонидан яратилган. Шундан сўнг улар Инновацион ривожланиш вазирлиги томонидан 618,2 млн сўм маблағ билан молиялаштирилган.
Ҳозирда улар Фарғона вилоятидаги «Олтиариқ Инновация» корхонаси томонидан ишлаб чиқарилмоқда.
«Ақлли» светофорларнинг дастури ўзбек тилида, бу эса харидорлар маҳсулотни созлашда қийинчиликларга дуч келмаслигини таъминлайди.
Ушбу светофорлар турли хил ноқулайликларни олдини олиш мақсадида автоматик равишда ўз ўрнини ўзгартира олади, яъни тепага кўтарилади ва тушади. Бу жараёнда ҳеч қандай инсон омили қатнашмайди.
Улар қувватли ва чидамли светодиодлар, монокристал кремний асосидаги қуёш панеллари, зангламас металл конструкция ва совуққа чидамли элетротехника қисмларидан ташкил топган.
Бугунги кунда ташкилотнинг ишлаб чиқариш қуввати ойига 20 та светофорга тенг. Бу кўрсаткич жорий йилнинг 3-чорак якунига қадар 2 баробарга оширилиши кутилмоқда.
Ўзбекистоннинг 8 та вилоятида 43 та шундай мобил светофорлар ўрнатилиб, 850 млн сўмлик даромадга эришилди.
Ушбу «ақлли» светофорлар учун Python дастурлаш тили орқали интеллектуал тизим ҳам яратилган бўлиб, у орқали тирбандликларнинг олдини олишга эришиш мумкин бўлади.
Аввалроқ Ўзбекистонда йўл белгиларининг техникавий шартларига ўзгартириш ва қўшимчалар киритилгани ҳақида хабар берилганди.
Изоҳ (0)