Yaponiya politsiyasi 8-iyul, juma kuni Nara shahrida otib tashlangan Yaponiya sobiq bosh vaziri Sindzo Abening xavfsizligini ta’minlashda kamchiliklar bo‘lganini tan oldi. Bu haqda BBC yozmoqda.
“Xavfsizlik bilan bog‘liq muammolar bo‘lganini rad etib bo‘lmaydi”, — dedi Nara politsiyasi boshlig‘i Tomoaki Onidzuka.
Abe siyosiy kampaniya tadbiri chog‘ida o‘qqa tutildi, bu jinoyat Yaponiyani chuqur larzaga soldi.
Politsiya xabariga ko‘ra, jinoyatda gumonlanuvchi, 41 yoshli Tetsuya Yamagami “ma’lum bir tashkilot”ga nisbatan alamzada bo‘lgan.
Yaponiya OAVlari tergovga yaqin manbalariga tayanib yozishicha, Yamagami Abeni allaqanday diniy guruhga aloqador deb hisoblagan, uning onasi ushbu guruh tufayli, moliyaviy jihatdan vayron bo‘lgan.
Gumonlanuvchi Abega qo‘lbola to‘pponchadan o‘z uzganini tan olgan.
“Nima sodir bo‘lganini aniqlash uchun zudlik bilan puxta tekshiruv o‘tkazishimiz kerak”, — dedi politsiya boshlig‘i Onidzuka aynan qanday kamchiliklarni ko‘rganiga aniqlik kiritmasdan. U jurnalistlar bilan muloqot qilayotib, ko‘z yoshlarini bazo‘r tiyib turgan.
Yamagami politsiyaga ma’lum qilishicha, uch yil Yaponiya harbiy-dengiz kuchlarida, O‘z-o‘zini mudofaa qilish dengiz kuchlarida xizmat qilgan. Yaqinda esa Yaponiya g‘arbidagi fabrikada ishlagan.
Abe Yaponiyaga hammadan ko‘proq bosh vazirlik qildi va 67 yoshida vafot etdi. U 10-iyul, yakshanba kuniga belgilangan parlament yuqori palatasiga saylovlar arafasida Liberal-demokratik partiya uchun kampaniya o‘tkazayotgan edi.
Amaldagi bosh vazir Fumio Kisida (u ham liberal-demokratik partiya a’zosi) “tili kalimaga kelmay qolgani”ni aytdi va yapon demokratiyasi “hech qachon zo‘ravonlikka taslim bo‘lmaydi” deb va’da berdi.
O‘qotar qurol qo‘llagan holda zo‘ravonlik sodir etish Yaponiyada juda kamdan-kam kuzatiladi, u yerda o‘qotar qurol taqiqlangan, siyosiy zo‘ravonlik holatlari esa deyarli uchramaydi.
Politsiya Abe nima sababdan nishonga aylangani va uning qotili yolg‘iz bo‘lgan-bo‘lmaganini aniqlashtirmoqda.
Abe orqa tomonidan o‘qqa tutilgan paytida chorrahada turib siyosiy nomzod nomidan nutq so‘zlayotgan edi. Fotosuratlarda voqeadan bir necha soniyalar avval gumonlanuvchi Abening yonida turganini ko‘rish mumkin.
Guvohlar katta to‘pponcha ko‘targan odam Abedan bir necha metr masofada harakatlangani va unga ikki marta o‘q uzganini tasvirlab berdi. Sobiq bosh vazir yerga yiqilgan, o‘tkinchilar esa qo‘rquvdan baqirib yuborgan.
Xavfsizlik kuchlari o‘qotarga tashlandi, u esa qochishga ham urinmadi.
Abeni o‘ldirgan qo‘shog‘iz qurol metal va yog‘ochdan qo‘pol qilib yasalib, mustahkam qora izolenta bilan o‘rab tashlangan.
Keyinroq gumonlanuvchining uyidan yana bir nechta qo‘lbola to‘pponcha va portlovchi moddalar topildi.
Abe bo‘ynidan yaralandi va vertolyotda kasalxonaga olib ketilayotgan paytda kuchli qon yo‘qotayotgan edi.
Xabarlarga ko‘ra, hujumdan keyin bir necha daqiqa davomida uning hushi joyida bo‘lgan, ammo uni davolashga o‘tkazishganida, hayot belgilari aniqlanmagan.
Tibbiyot xodimlari uni qutqarish uchun bir necha soat ter to‘kkan, ammo 8-iyul kuni mahalliy vaqt bilan 17:03 da (Toshkent vaqti bilan 13:03) u vafot etgan deb e’lon qilindi.
Yaponiya ijtimoiy tarmoqlarida “Biz zo‘ravonlikni emas, demokratiyani xohlaymiz” xeshtegi butun 8-iyul kuni trendda bo‘ldi, ko‘plab foydalanuvchilar ushbu hodisa yuzasidan o‘z dahshati va nafratini bildirdi.
2014-yilda Yaponiyada o‘qotar quroldan o‘lim holatlari bor-yo‘g‘i oltita bo‘lgan, taqqoslash uchun, AQSHda — 33 599 ta. Qurol sotib olish uchun odamlar qat’iy tekshiruvdan va ruhiy salomatlik testidan o‘tishi kerak. Hatto u holda ham faqat sochma o‘qli ov miltig‘i (drobovik) va pnevmatik vintovkalarga ruxsat beriladi.
Izoh (0)