Украина президенти Владимир Зеленский ҳарбийларга ҳозир Россия армияси назорати остида бўлган жанубий қирғоқбўйи ҳудудларни жанг билан қайтариб олишни буюрган, деб ёзади «РБК» Украина мудофаа вазири Алексей Резниковга таяниб.
«Бу сиёсий жиҳатдан мамлакатимизга жуда зарур эканини тушунамиз. Президент олий ҳарбий бош қўмондонга режа ишлаб чиқишни топширди», — дея аниқлик киритди у.
Резниковнинг сўзларига кўра, бунинг учун Украина қуролли кучлари Ғарб қурол-яроғлари билан таъминланган «миллионлаб жанговар кучлар»ни тўпламоқда.
Бош вазир ўринбосари Ирина Верешчук 10 июль, якшанба куни Херсон ва Запорожье вилоятлари аҳолисини эвакуация қилишга, шу жумладан, Қрим орқали ҳам ўтишга чақирганди. «Бу Украина қуролли кучлари ҳужум ҳаракатлари чоғида тинч фуқароларни хавф остига қўймаслиги учун керак», — дея аниқлик киритганди у.
Шу билан бирга, бош вазир ўринбосари ҳужум «қандай вақт оралиқларида» ўтказилишини билмаслигини айтди.
Бунгача Верешчук Россия кучлари назорати остида бўлган жанубий Украина ҳудудлари аҳолисини Киев назоратидаги ҳудудларга эвакуация қилишга бир неча марта даъват этганди.
Ҳозир Херсон вилояти, шунингдек, Запорожье вилоятининг марказий ва жанубий қисмлари тўлиқ Россия қуролли кучлари назорати остида бўлиб турибди. Ушбу ҳудудларда ҳарбий-фуқаролик маъмуриятлари тузилган.
10 июль куни Резников фронт чизиғи бўйлаб қўшинлар камайгани туфайли, Украина қўшимча қурол-яроғлар етказиб берилишига эҳтиёжманд эканини айтганди.
Шу пайтгача АҚШ Киевга HIMARS баравар ўт очиш реактив тизимларини бир неча ўн километр масофага отилувчи снарядлар билан бирга етказиб берганди. Энди Украина 300 километргача масофали АТАCМS тезкор-тактик ракета мажмуаларини олишга умид қилмоқда, аммо АҚШ ҳозирча рози бўлмаяпти.
Россия Мудофаа вазирлиги июль бошида Украина армияси барча йўналишларда сезиларли талафотларни бошидан кечираётганини даъво қилганди. Идора маълум қилишича, Украинанинг 220 дан ортиқ самолётлари, 130 дан зиёд вертолётлари, 3,8 мингта танки, 3 мингта дала артиллерияси қуроллари ва миномётлари йўқ қилинган.
Эслатиб ўтамиз, АҚШ президенти Жо Байден Украинага қарийб 400 миллион доллар миқдорида қўшимча ҳарбий ёрдам ажратишни топширди. АҚШ Мудофаа вазирлиги аниқлик киритишича, ушбу ёрдам пакетига тўртта HIMARS баравар ўт очиш реактив тизими ва унинг ўқ-дорилари, учта тактик транспорт воситаси, 155 миллиметрли артиллерия ўқ-дорилари, портлатувчи ўқ-дорилар, контрбатарея кураш тизимлари, ҳарбий техника учун эҳтиёт қисмлар ва бошқа ускуналар киради.
Изоҳ (0)