Япония полицияси 8 июль, жума куни Нара шаҳрида отиб ташланган Япония собиқ бош вазири Синдзо Абэнинг хавфсизлигини таъминлашда камчиликлар бўлганини тан олди. Бу ҳақда BBC ёзмоқда.
«Хавфсизлик билан боғлиқ муаммолар бўлганини рад этиб бўлмайди», — деди Нара полицияси бошлиғи Томоаки Онидзука.
Абэ сиёсий кампания тадбири чоғида ўққа тутилди, бу жиноят Японияни чуқур ларзага солди.
Полиция хабарига кўра, жиноятда гумонланувчи, 41 ёшли Тэцуя Ямагами «маълум бир ташкилот»га нисбатан аламзада бўлган.
Япония ОАВлари терговга яқин манбаларига таяниб ёзишича, Ямагами Абэни аллақандай диний гуруҳга алоқадор деб ҳисоблаган, унинг онаси ушбу гуруҳ туфайли, молиявий жиҳатдан вайрон бўлган.
Гумонланувчи Абэга қўлбола тўппончадан ўз узганини тан олган.
«Нима содир бўлганини аниқлаш учун зудлик билан пухта текширув ўтказишимиз керак», — деди полиция бошлиғи Онидзука айнан қандай камчиликларни кўрганига аниқлик киритмасдан. У журналистлар билан мулоқот қилаётиб, кўз ёшларини базўр тийиб турган.
Ямагами полицияга маълум қилишича, уч йил Япония ҳарбий-денгиз кучларида, Ўз-ўзини мудофаа қилиш денгиз кучларида хизмат қилган. Яқинда эса Япония ғарбидаги фабрикада ишлаган.
Абэ Японияга ҳаммадан кўпроқ бош вазирлик қилди ва 67 ёшида вафот этди. У 10 июль, якшанба кунига белгиланган парламент юқори палатасига сайловлар арафасида Либерал-демократик партия учун кампания ўтказаётган эди.
Амалдаги бош вазир Фумио Кисида (у ҳам либерал-демократик партия аъзоси) «тили калимага келмай қолгани»ни айтди ва япон демократияси «ҳеч қачон зўравонликка таслим бўлмайди» деб ваъда берди.
Ўқотар қурол қўллаган ҳолда зўравонлик содир этиш Японияда жуда камдан-кам кузатилади, у ерда ўқотар қурол тақиқланган, сиёсий зўравонлик ҳолатлари эса деярли учрамайди.
Полиция Абэ нима сабабдан нишонга айлангани ва унинг қотили ёлғиз бўлган-бўлмаганини аниқлаштирмоқда.
Абэ орқа томонидан ўққа тутилган пайтида чорраҳада туриб сиёсий номзод номидан нутқ сўзлаётган эди. Фотосуратларда воқеадан бир неча сониялар аввал гумонланувчи Абэнинг ёнида турганини кўриш мумкин.
Гувоҳлар катта тўппонча кўтарган одам Абэдан бир неча метр масофада ҳаракатлангани ва унга икки марта ўқ узганини тасвирлаб берди. Собиқ бош вазир ерга йиқилган, ўткинчилар эса қўрқувдан бақириб юборган.
Хавфсизлик кучлари ўқотарга ташланди, у эса қочишга ҳам уринмади.
Абэни ўлдирган қўшоғиз қурол метал ва ёғочдан қўпол қилиб ясалиб, мустаҳкам қора изолента билан ўраб ташланган.
Кейинроқ гумонланувчининг уйидан яна бир нечта қўлбола тўппонча ва портловчи моддалар топилди.
Абэ бўйнидан яраланди ва вертолётда касалхонага олиб кетилаётган пайтда кучли қон йўқотаётган эди.
Хабарларга кўра, ҳужумдан кейин бир неча дақиқа давомида унинг ҳуши жойида бўлган, аммо уни даволашга ўтказишганида, ҳаёт белгилари аниқланмаган.
Тиббиёт ходимлари уни қутқариш учун бир неча соат тер тўккан, аммо 8 июль куни маҳаллий вақт билан 17:03 да (Тошкент вақти билан 13:03) у вафот этган деб эълон қилинди.
Япония ижтимоий тармоқларида «Биз зўравонликни эмас, демократияни хоҳлаймиз» хэштеги бутун 8 июль куни трендда бўлди, кўплаб фойдаланувчилар ушбу ҳодиса юзасидан ўз даҳшати ва нафратини билдирди.
2014 йилда Японияда ўқотар қуролдан ўлим ҳолатлари бор-йўғи олтита бўлган, таққослаш учун, АҚШда — 33 599 та. Қурол сотиб олиш учун одамлар қатъий текширувдан ва руҳий саломатлик тестидан ўтиши керак. Ҳатто у ҳолда ҳам фақат сочма ўқли ов милтиғи (дробовик) ва пневматик винтовкаларга рухсат берилади.
Изоҳ (0)