Туркиялик ва мўғулистонлик археологлар Туркиянинг Ван вилоятида Чингизхоннинг набираси Ҳулокухон ҳукмронлиги даврига тегишли иншоот қолдиқларини топди, деб хабар беради Naked Science.
Мўғулистон давлат университети тарих кафедраси олимлари қадимги форс ва арман манбаларидан XII асрда Ҳулокухоннинг ёзги саройи жойлашган жой ҳақида маълумот топган. Ушбу маълумотларни Ван тарих музейидаги артефактлар билан таққослаб кўриб, олимлар сарой жойлашган жойни аниқлаган.
Қазиш ишлари натижасида археологлар Ҳулокуийлар давлати даврига тегишли деб тахмин этилаётган карвонсарой ва сопол тандир қолдиқларини топди. Шунингдек, улар деворлар қолдиқларини аниқлади, уларнинг жойлашуви хон саройини эслатади.
1217—1265 йилларда яшаб ўтган Ҳулокухон ўз даврининг энг қобилиятли мўғул саркардаларидан бири бўлган. Унинг истилолари натижасида юзага келган давлат Ҳулокуийлар давлати деб аталади. У Эрон назарийлари, Аббосийлар (Бағдод) халифалиги ва Айюбийлар султонлиги (Миср ва Ғарбий Осиё)га қарши мўғулларнинг Яқин Шарқ юришига раҳбарлик қилган. Ушбу давлатларнинг барчаси қулаган, уларнинг ўрнида Ҳулокухон ўз давлатини ташкил қилган.
Ўша даврнинг форс тарихчилари ёзишича, Ҳулокухон қўшинлари сони 70 минг кишини ташкил қилган. Эҳтимол, хоннинг ўзи буддавийлик, рафиқаси эса насронийлик дини вакили бўлган. Шу сабабли олимлар ёзги сарой ёнидан буддавийлик ва насронийлик ибодатхоналари вайроналарини топишга ҳам умид қилмоқда.
Бугунги кунга қадар дунёда тўртта мўғул саройи қолдиқлари топилган. Булар Ички Мўғулистон (Хитой таркибига киради)даги Хубилай саройи, Эрондаги Амбагайхон саройи ва Астрахан вилояти (Россия)даги Селитренное қадимий шаҳрида жойлашган Олтин Ўрда пойтахти — Сарой Боту ёки Эски Саройдир. Волгоград вилоятидаги Саревское қадимий шаҳрида эса Янги Сарой ёки Сарой Берке жойлашган бўлиб, у XIV асрда Ўрда пойтахтига айланган.
Изоҳ (0)