Буюк Британия ташқи ишлар вазири Лиз Трасс Консерватив партия етакчиси ва мамлакат бош вазири лавозимига ўз номзодини қўйди, деб ёзади «РБК». Бу ҳақда у The Telegraph учун ёзган мақоласида маълум қилди.
«Мен ўз номзодимни илгари суряпман, чунки одамларни ўз ортимдан эргаштира оламан, ваъдаларимни бажара оламан ва мураккаб қарорларни қабул қила оламан», — деб ёзди у. Вазир таъкидлашича, Британия ҳозир глобал иқтисодий инқироз фонида, шунингдек, Россия ва Хитойнинг хатти-ҳаракатлари туфайли «улкан синовлар»га дуч келмоқда.
Трасс, бош вазир бўлган тақдирда, биринчи кундан солиқларни қисқартиришга ваъда берди.
Трасс Украинани фаол равишда қўллаб-қувватлайди ва Россия операциясини қоралайди. У бошланганидан кейин вазир Британия Россия иқтисодиётини вайрон қилмагунича тинчланмаслигини айтганди. У мамлакатни «дунё майдонидаги қочқин» деб атаганди.
ТИВ раҳбари, шунингдек, Киевни қўллаб-қувватлаш ва Украина ҳудудий ён босса, тезда тинчликка эришилишини кўзда тутувчи ёндашувни илгари суришни тўхтатиш керак, деб ҳисоблайди.
«Охир-оқибат гап украиналиклар нимани хоҳлаётгани ҳақида бормоқда. Президент Владимир Зеленский нима исташини аниқ-равшан айтди. Биз уни бу борада қўллаб-қувватлашимиз керак. Ғарб томонидан илгари сурилаётган тезликда тинч йўл билан тартибга солиш ёндашуви ўринсиз. Биз Украинанинг ўз ҳудудларидан воз кечишини билдирувчи тезкор тинчликни ўзимизга эп кўрмаймиз», — деган у.
Шунингдек, Британия ташқи ишлар вазирининг парламентдаги ўринбосари Рехман Чишти ҳам ҳукмрон Консерватив партия ва ҳукумат раҳбари лавозимига номзодини қўймоқчи.
Шу тариқа, ушбу лавозимга номзодлар сони 11 кишига етди. Бундан аввал собиқ соғлиқни сақлаш вазири Сажид Жавид, собиқ ташқи ишлар вазири Жереми Хант, собиқ таълим вазири Надим Захавий, собиқ молия вазири Риши Сунак, савдо алоқалари бўйича кичик вазир Пенни Мордонт бош вазирликка ўз номзодларини қўйганди.
Айни пайтда Буюк Британия бош вазири вазифасини 7 июль куни истеъфога чиқишини эълон қилган Борис Жонсон бажармоқда. У ҳукумат аъзоси Крис Пинчернинг маст ҳолатда жанжал чиқаргани ва шилқимлик қилгани туфайли юзага келган шов-шувдан кейин истеъфо берди. Жонсон Пинчер аввалроқ жинсий шилқимликларда айбланганини билгани, аммо шунга қарамай уни юқори лавозимларга тайинлагани маълум бўлди.
Изоҳ (0)