Японияда ҳукмрон Либерал-демократик партия парламент юқори палатасига сайловларда ғолиб бўлди, деб ёзади «Интерфакс».
ЛДП парламентда 63 та ўринга эга бўлади, ҳукмрон коалицияга кирувчи «Комейто» партияси аъзолари яна 13 та мандатни қўлга киритади. Шу тариқа, блокка 125 парламентарийдан 76 нафари вакиллик қилади.
Ҳукмрон коалиция билан биргаликда Конституцияга тузатишлар киритилишини қўллаб-қувватловчи «Япония инновациялар партияси» парламент юқори палатасида 12 та ўринга эга бўлади.
Шу билан бирга, тузатишлар ҳақида референдум ташкил қилиш учун иккала палатада овозларнинг учдан икки қисмини қўлга киритиш керак.
Япония Конститутисиясининг 9-моддасини ўзгартиришни либерал-демократлар талаб қилмоқда. Ушбу модда мамлакат уруш олиб боришдан ва ўзининг қуруқлик, денгиз ва ҳарбий-ҳаво кучларидан воз кечишини кўзда тутади. Япония бош қонунига 1947 йилдан буён ҳеч қандай ўзгартиришлар киритилмаган, аммо энди, Либерал-демократик партия бош котиби Тошимицу Мотэгининг сўзларига кўра, хавфсизлик соҳасида жиддий ўзгаришлар юз берган.
Японияда сайловлар Япония собиқ бош вазири ва Либерал-демократик партия собиқ раиси Синдзо Абэнинг суиқасд оқибатида вафот этиши фонида бўлиб ўтди. Нара шаҳридаги сайловолди тадбири чоғида унга ўқ узилди. Қотилликда 41 ёшли собиқ ҳарбий гумонланмоқда. У ўз айбига иқрор бўлди.
Икки марта (2006—2007 ва 2012—2020 йилларда) бош вазир бўлган Абэ Конституциянинг 9-моддаси ўзгартирилиши тарафдори эди. У қуролли кучлардан воз кечишни назарда тутса ҳам, Япониянинг ўз-ўзини мудофаа қилиш кучлари бор. Уларнинг ҳуқуқий мақоми баҳсли бўлгани сабабли, либерал-демократлар бош қонунга ушбу ҳарбий тузилманинг роли ва ваколатларини ёзиб қўйишни таклиф этмоқда.
Изоҳ (0)