Ижтимоий тармоқларда Қашқадарёда ЙПХ инспектори ва ҳайдовчи ёқалашгани акс этган видео тарқалгани хабар берилганди. Вилоят ИИБ ахборот хизмати раҳбари Жавлон Бахтиевнинг «Дарё»га маълумот беришича, ҳайдовчига маъмурий баённома тузилиб, автомобили жарима майдонига жойлаштирилган.
Маълум қилинишича, воқеа 2022 йилнинг 7 июль куни Қашқадарё вилоятининг Кўкдала туман ҳудудидан ўтувчи Яккабоғ—Шўрбозор автомобиль йўлининг 69-километрида содир бўлган.«Шу ҳудудда хизмат олиб бораётган йўл патруль хизмати инспектори Nexia-2 русумли транспорт воситасини фуқаро У.У. ҳужжатларсиз бошқариб кетаётганини аниқлаган. Ҳуқуқбузарлик ҳолати тегишли тартибда расмийлаштириб, автотранспорт жарима майдонига олиб борилиши зарурати туғилганда ҳайдовчи ЙПХ инспектори талабларига бўйсунмаган. Юзага келган зиддиятдан фойдаланиб, транспорт воситасида воқеа жойидан яширинган», — дейди Жавлон Бахтиев.
Қўшимча қилинишича, ҳайдовчига нисбатан Маъмурий жавобгарлик тўғрисидаги кодекснинг 194-моддаси (ички ишлар органлари ходимининг қонуний талабларини бажармаслик)га асосан маъмурий баённома расмийлаштирилиб, автомашинаси жарима майдонига жойлаштирилган.
Шунингдек, ЙПХ инспектори ҳаракатларига ҳуқуқий баҳо бериш мақсадида ўрнатилган тартибда хизмат текшируви тайинланган.
Изоҳ (0)